Arsenal in player 7 chhuahtir an tum

Season liam taah uiawm taka champion zo ta lo Arsenal chu season tharah tha zawka inlan a, squad chhah zawk neih tumin tan an khawh mek. Gunners hian bazarna tur sum tam zawk an neih theih nan an player thenkhat hralh a, £100m tuak nghah an tum. Arsenal chhuahsan tur langsar zingah Granit Xhaka leh Thomas Partey te an tel.
Arsenal hian an squad thuam chak thar tumin player tha lak tur an dap nasa hle. Chelsea leh Germany forward Kai Havertz an le fel thei tep tawh. Havertz manah hian Chelsea nen inremna an nei tawh a, hlawh leh contract chungchangah pawh Germany forward hi inremna an neihpui thei tawh bawk niin tarlan a ni. Havertz bakah hian Ajax leh Netherlands defender Jurrien Timber chu mimal inremna an neihpui thei tawh bawk a, an tlarhnung thuam chak turin Timber hi an la lut ngei tura ngaih a ni bawk.
Kai Havertz leh Jurrien Timber bakah hian West Ham captain Declan Rice turin Arsenal hian hma an la chhunzawm zel bawk. Gunners hian Rice lak tumin tum hnih West Ham an dawr tawh a, an la hlawhtling lo ve ve. Rice lak tuma an dawr nawn leh hmain an inkarah EPL champion Manchester City an tlazep a, City hian sum sen tam huam zawk mah se an hlawhtling bik chuang lova, West Ham in an lo hnar ve tho. Heti a nih vang hian Arsenal in Rice lak theih beiseina an nei sang thar leh a, England midfielder hian Arsenal-a khelh a lo chak zawk bawk nen an dawr nawn leh hunah chuan inremna an neih theih tawh a beiseiawm.
Kai Havertz, Jurrien Timber leh Declan Rice te hi an la rual thei a nih chuan £200m tal an sen a ngai dawn. Sum an seng hnem lutuk hnawhkhah nan an player hralhna atangin sum tuak an mamawh. Arsenal captain hlui leh an midfielder pawimawh Granit Xhaka chuan Bayer Leverkusen a zawm ngei tura ngaih a ni a. Arsenal chuan Xhaka hi £13m vel bawrin hralh theih an inbeisei. Season liam taah mual laia Xhaka kawppui fuh tak Thomas Partey pawh chhuak ngei tura ngaih zingah a tel a, Juventus in an ngaihven Partey manah hian £20m vel bawr tel theih an inbeisei.
Forward Folarin Balogun chuan season liam ta khan loan in Reims a zawm a, khelh 39 atanga goal 22 zet thunin a chetha hle, Balogun hi RB Leipzig leh AC Milan ten an ngaihven viau a. Gunners chuan Balogun manah hi £35m velin hralh theih an inbeisei. Kai Havertz an lak luh dawn vangin rawlthar Eddie Nketiah tan chhuah a finthlak dawn a, Crystal Palace in lak an duh Nketiah hi a chhuah a rinawm. Defender thar Timber an neih hmel vangin manager Mikel Arteta chuan Rob Holding chhuah a phalsak a. Holding hi £10m. velin hralh theih an inbeisei.
Arsenal hian season liam ta khan Manchester City leh Ukraine defender Oleksandr Zinchenko an la lut a, Zinchenko a luh hnuin Scotland defender ?Kieran Tierney-a’n hmun a chang mumal thei tawh lo. Khelhna hmun a chan tam theih tak loh vangin Tierney hi a chhuah a rinawm. Tierney bakah hian an player manto ber ni tura an lak luh Nicolas Pepe pawh Arsenal hian chhuahtir an tum bawk.