Ballon d’Or dawng tura rinkai zual 10

Football huanga chawimawina ngaihhlut hlawh ber ‘Ballon d’Or’ chu October 30, khian Paris khawpuiah semchhuah a ni dawn a. Chawimawina sang dawng tur inrinsiakna a ngaihnawm thei hle. Tun tumah hian Goal.com in Ballon d’Or 2023 dawng tura rinkai zual an chhawpchhuah 10 kan tarlang ang.
10. Julian Alvarez – Manchester City
Argentina leh Manchester City forward Julian Alvarez hi player thiam bik a ni kher lo a nih pawhin player vannei bik chu a ni chiang mai. Inelna a hmachhawn hmasak berah trophy lian tak tak a dawng zawn mawlh mawlh. Copa America a hmachhawn hmasak berah an champion nghal a. Finalissima vawi khatnaah chak zawkah an tang a, World Cup, Champions League, Premier League leh FA Cup a hmachhawn hmasak ber tumin an champion vek bawk.
World Cup 2022 a chetha tak Alvarez hian season liam ta khan inelna hrang hrangah goal 23 a thun a, assist vawi ruk a nei. A vanneih em vangin Ballon d’Or dawng tura rinkai zual 10 zingah a tel a. Chawimawina sang dawng em lo mah se bul tanna tha tak zawng a ni phawt mai.
9. Robert Lewandowski – FC Barcelona
Ballon d’Or a la dawn loh vanga player vanduai Robert Lewandoski hian a ropuina German Bundesliga chhuahsan mah se La Liga-ah a thiam a theihnghilh chuang lo. La Liga-a a season hmasa berah Barcelona champion pui nghal a. Barca hi Supercopa de Espana.-ah a champion pui bawk. Poland captain Lewandoski hian season liam ta khan inelna hrang hrangah goal 36 a thun a, assist vawi 11 a nei bawk.
8. Victor Osimhen – Napoli
Napoli forward Victor Osimhen hi inelna hrangah goal thun thei tak mai a ni a, season liam ta khan inelna hrang hrangah goal 33 a thun a, Serie A top-scorer a ni a, assist vawi nga a nei bawk. Kum 33 zet hnuah Serie A-ah Napoli an champion theih nan a thawhhlawk hle, Napoli tan a chetthat em vangin Europe-a club lian tak takin lak tumin an ngaihven mek a. Season tharah club lian zawk tan a khelh a rinawm viau. Hetihlai hian Napoli chuan an forward pawimawh hi chelh tumin tan an khawh nasa viau bawk.
7. Ilkay Gundogan – Manchester City
Manchester City leh Germany midfielder Ilkay Gundogan hian season liam ta khan a hming a chher lian lehzual hle. Club leh ram tan goal 13 a thun a, assist vawi sarih a nei bawk. City hi Champions League, Premier League leh FA Cup-ah a champion pui a. FA Cup final-ah goal hnih a thun nghe nghe. He player mawimawh tak hi season tharah chuan La Liga champion FC Barcelona tan a khel tawh thung ang.
6. Rodri – Manchester City
Manchester City leh Spain midfielder pawimawh Rodri hi Ballon d’Or dawn phu ber zingah a tel. Manchester City treble champion an nih theih nante, Nations League-ah Spain an champion theih nana thawhhlawk em em mai a ni.
Rodri hian season liam ta khan goal li a thun a, assist vawi sarih a nei bawk. Inkhel pawimawh leh boruak sangah a chetha thei viau a, champions league-ah City champion na goal thuntu niin ‘Man of the match’ ah thlan a ni. Hemi hnu lawk hian Nations League semi-final-ah a khel tha zui leh viau a, Italy an hneh tumin ‘Man of the match’ a ni zui leh a. Nations League final-ah Croatia an hmachhawn tumin a khel tha leh viau bawk. Rodri hian Manchester City chu Champions League, Premier League leh FA Cup-ah a champion pui a, season liam ta khan City tan vawi 52 zet a khel nghe nghe. Spain chu UEFA Nations League-ah a champion pui bawk.
5. Kevin De Bruyne – Manchester City
Manchester City in trophy lian pathum an lak kawp theih nana thawhhlawk zet mai chu ball thiam leh fing Kevin de Bruyne hi a ni. Ani hi tunlaia playmaker tha ber ang hiala ngaih a ni. Ball a thiam a, a ball pek a fingin a khawhhmuh a fiah bawk si a, fak a hlawh hle. Haaland tiropui lehzualtu chu Belgium captain De Bruyne hi a ni tih phat rual a ni lo.
Kevin de Bruyne hian season liam ta khan goal 10 a thun a, assist vawi 32 zet a nei bawk. Manchester City chu Champions League, Premier League leh FA Cup-ah a champion pui. Champions league final-ah Inter Milan an hmachhawn tumin hliam vangin a khel tluan thei lo a, City in ngai an awh theih loh phah viau nghe nghe a ni.
4. Vinicius Jr – Real Madrid
Real Madrid leh Brazil winger tlanchak, ball thiam em em bawk si Vinicius Junior hian season liam ta khan Club leh ram tan goal 25 a thun a, assist vawi 26 zet a nei tling bawk. Real Madrid hi Copa del Rey, Club World Cup leh UEFA Super Cup-ah a champion pui. Ball thiam leh tlan chak tak a ni a, a kum a la naupang bawk nen October-a semchhuah tur Ballon d’Or a dawng em rih lo a nih pawhin he chawimawina hi engtikah emaw chuan a la dawn ngei a beiseiawm.
3. Kylian Mbappe – PSG
France leh Paris St-Germain forward ropui Kylian Mbappe hian season lian ta khan inelna hrang hrangah goal 55 ngawt a thun tling a. France player awm tawh zawng zawng zingah season khata goal 55 thun tling thei hmasa ber a ni a, France record thar a siam. Goal 55 ngawt a thun bakah hian assist vawi 14 a nei tling bawk a, PSG chu Ligue 1 leh Trophee des Champion-ah a champion pui.
Mbappe hi World Final-ah a che ropui hle a, Argentina lakah hattrick a siam. World Cup 2022-ah hian goal thun hnem ber niin Golden Boot a dawng bawk. Mimal takin chetha viau mah se Ballon d’Or dawng tur meuh chuan Erling Haaland leh Lionel Messi te atan nekchhuah har rih tura ngaih a ni.
2. Erling Haaland – – Manchester City
Inelna lian pathuma Manchester City champion puitu Erling Braut Haaland hian season liam ta khan club leh ram tan goal 56 a thun a, assist vawi kua a nei. Manchester City chu champions League, Premier League leh FA Cup-ah a champion. Treble champion an nih theih nan Haaland hian a thawhhlawk hle a, Premier League leh champions league-ah top-scorer a ni a. European Golden Shoe a dawng dawn bawk. EPL leh champions league-ah record a siam chho mawlh mawlh. City tan ropui taka a chet laiin an ram Norway in World Cup an khel phak lo hlauh thung. Haaland hi Ballon d’Or dawng tura rinkai zual pahnih zingah a tel ngei a. Messi nekchhuak em tur chuan rin a har rih. Ballon d’Or a dawng lo a nih pawhin UEFA award-ah erawh a langsar viau tura ngaih a ni thung.
1. Lionel Messi – PSG
Ballon d’Or vawi sarih ngawt dawng tawh a, he chawimawina dawng ngun ber ni mek Lionel Messi hian season liam ta khan club leh ram tan goal 39 a thun a, assist vawi 25 a nei bawk. Khawvela inelna ngaihhlut hlawh ber FIFA World Cup-ah Argentina a champion pui a. World Cup ‘Best player’ a ni bawk. Paris St-Germain chu Ligue leh Trophee des Champion-ah a champion pui bawk. World Cup-ah Argentina a champion pui miau vangin Ballon d’Or dawng tura rinkai ber a ni a. A vawi riat nan Ballon d’Or dawng in, amah hnaih bertu Cristiano Ronaldo nen an inkar a tizau leh zual tura ngaih a ni.
Goal.com in Ballon d’Or dawng tura rinkai zual an chhawpchhuah zingah he chawimawina kawl mektu Karim Benzema chu 12-aah a awm.