Arsenal in striker thar an mamawh

English Carabao Cup leh FA Cup-ah an tlawm zawn hnuin Arsenal manager Mikel Arteta chuan striker tha a mamawhzia a hrechhuak ve ta nge nge a. Arteta hian club thuneitute hnenah striker a mamawh thu a thlen ve ta hlawl mai. Gunners thuneitute hian striker thar lak tur an zawng nghal tura ngaih a ni a.
EPL-ah pahnihna ni mek Arsenal hian Carabao Cup semi-final-ah Newcastle an hmachhawn tum khan shot 23 lai an nei a, heng zingah pathum chauh hi goal zawnah (shot on target) a kal. FA Cup-ah Manchester United an hmachhawn tum khan shot vawi 26 zet an nei a, chung zingah pasarih chauh chu goal zawnah a kal bawk. United lakah tam zawk ni reng chungin an chak zo lova, an hun tha neih pawh ho lam tamin an hlah leh mai thin. Manager Mikel Arteta-a’n striker-a a hman Kai Havertz phei chuan a thelh ho leh zual hle. Heti a nih vang hian Gunners hian striker thar la tur an dap ngei a ngai a, Arsenal striker thar ni thei dinhmuna dingte kan tarlang ang.
Jonathan David (Lille)
Lille striker Jonathan David hian France Ligue 1 season kal mekah goal 11 a thun tling tawh a, Mason Greenwood nen top-scorer a ni mek. Lille tan hian season kal meka inelna hrang hrangah vawi 28 a inlan a, goal 17 thunin, assist vawi 5 a nei a, minute 133.2 dan zela goal thun ziah ang a ni. Inelna lian zawk Champions League-ah goal li a thun tawh bawk. Arasenal hian an la lut a nih pwhin Champions League-ah an chhwr zui thei dawn. Jonathan David hian season tawp ruala contract a hman zawh dawn vanagin a man a to uchuak dawn lova, Arsenal duh zawng tak a ni mai thei.
Liam Delap (Ipswich Town)
England Under-21 striker Liam Delap hian season kal mekah Ipswich Town tan a khel tha viau, inelna hrang hrangah vawi 20 inlanin goal 8 a thun a, aassist vawi hnih nei tawh bawkin, minue 183.4 dan zela goal thun ziah ang a ni. A khelh meka Ipswich Town chuan Delap manah hian £15m an chhiar. A kum a la naupang a, hmabak eng tak nei a nih vangin Arsenal nen an inhmeh viau tura ngaih a ni.
Jhon Duran (Aston Villa)
Season kal meka inelna hrang hrangah vawi 26 inlan a, goal 12 thun a, minute 81.3 dan zela goal thun Duran hi club lian hrang hrngin an ngaihven a, Aston Villa chuan zawrh lai a nih loh thu an sawi ve mek bawk. Duran hian October thla mai khan contract thar a ziak a, a lak chhuah nan sum hlawm lian a ngai ngei dawn. Contract a ziah tharna la rei lo mah se Ollie Watkins a awm miau vangin main striker a ni phak lo. A beisei leh a phu anga khelhna hmun a chan tam theih loh vangin Villa Park chhuahsan a hnial lo tura ngaih a ni.
Viktor Gyokeres (Sporting)
Sweden leh Sporting Lisbon tana chetha thin tak Viktor Gyokeres hian season kal mekah League match vawi 17 a hmachhawn atangin gial 21 zet a thun a, assist vawi hnih a neih tawh bawkin minute 72.1 dan zela goal thun ziah ang a ni. Club leh ram tan a chetthat theih em vangin club lian hrang hrangin an ngaihven a, Manachester United pawhin an hmutai viau. Gyokeres ngei pawh hian a pu hlui Ruben Amorim nen United tan thawh dun a chak niin an sawi. Sporting chuan an forward goal thun thei tak Gyokeres lakchhuah theihna zat hi 100m euro (£83.1m) a ni.
Alexander Isak (Newcastle United)
Inkhel a hmachhawn hnuhnung vawi 15-ah goal 14 zet thun thei Alexander Isak hi club lian hrang hrangin an ngaihven viau a, ngaihven zual zingah Arsenal ngei pawh hi an tel. Club lian hrang hrangte ngaihen Isak hi Newcastle United chuan kawl chhunzawm ngei an tum thu an sawi nawn a. Loh theih loha an hralh dawn a nih pawhin British transfer record khum ngeia hralh an tum dawn. A man a to dawn vangin Arsenal tan lak a har tura ngaih a ni a.
Omar Marmoush (Eintracht Frankfurt)
Manchester City pawhin an hmuh taih em em Omar Marmoush hian season kal meka inelna a hmachhawn tawh vawi 25 atangin goal 19 a thun a, assist vawi 11 zet a nei tling bawk a, a chetha rem rem hle. Arsenal tan pawh Marmoush hi an tlarhma thuam chak a, an goal thun khawl ni tura player rintlak leh awhawm tak a ni.
Victor Osimhen (Galatasaray)
Napoli player, loan a chhuak mek Victor Osimhen hian Turkish League-ah vawi 13 khelin goal 10 a thun a, assist vawi li a nei tawh. Club lian zawkte pawhin an hnen pan turin an duh viau a, Arsenal in an mamawhna a sang leh zual. Arsenal hian an la lut thei a nih chuan an harsatna sut kiansaktu a nih theih ngei a rinawm.
Benjamin Sesko (RB Leipzig)
Slovenia striker Benjamin Sesko hi Arsenal in an hmuhtaihna a rei tawh a, an awt bang hleithei meuh lo. Sesko hi la lut thei ta se FA Cup atangin an la tla kher lo mai thei. Sesko hian season kal meka inelna hrangah vawi 24 a inlan tawh a, gial 12 a thun bakah assist vaw 3 lai a nei tawh bawk. Lak tuma ngaihventu Arsenal nen hian an inhmeh viau tura ngaih a ni.
Dusan Vlahovic (Juventus)
Tharum ngah leh tlarhmaa hriam tak a nih vangin Dusan Vlahovic hi Arsenal mamawh chhanna tling ngei tura ngaih a ni. Serbian pa huaisen Vlohovic hian season kal meka inelna hrang hrangah vawi 23 inlan tawhin goal 12 a thun a, assist vawi hnih a nei tawh bawk. Arsenal hian la lut thei ngat se goal tam zawk thunin, team chakpuitu pawimawh tak a nih theih ngei a rinawm hle.