Arsenal leh City an inum zel

February 25, Inrinni zan khan English Premier League khelh chhunzawm a ni a, table chung lama awm pahnih; Arsenal leh Manchester City ten hnehna an chang a, champion tumin an inum fal zui zel. Arsenal leh City te an chak lai hian team lian Liverpool chu Crystal Palace nen an inhnehtawk thung.
Gunners chakpuitu Martinelli
EPL-ah point hniha hmahruai a, table chung ber luah mektu Arsenal hi King Power Stadium-ah lenglut in, 14-naa awm mek Leicester City an hmachhawn a. Gabriel Martinelli goal thun hmanga hnehna changin, hma an hruai zui zel.
King Power Stadium-a lenglut Arsenal hian an khel tha a, ball chang tam zawkah tangin mualneitu an thunun hneh viau a. Fal taka ball chang tam zawk ni chungin goal erawh an thun thei lawk lo thung. Chawlhlawk hma hian Leandro Trossard chuan goal a thun zet nang a VAR rawn a nih hnuin hnawl a ni thung.
An goal hmasa hnawlsak an ni a, chawlhlawk hmaa goal an thun theih loh hnuin Gunners hian second half-ah goal an thun ta thuai thung. Second Half tan atanga minute khat hnu lekah Trossard ball pek tha tak chu Garbiel Martinelli chuan lei hrulah fuh zetin a pet goal a, hmahruaina goal a thun. Arsenal manager Mikel Ar-teta chuan rawlthar striker Eddie Nke-tiah awltirin Marti-nelli a dah luhtir a, a ti fuh viau a, point thum hlu tak an hmuh phah ta hial a ni. Martinelli goal thun hnu lawk hian Bakuyo Saka chuan goal a thun zui leh thuai naa, offside vangin hnawl a ni leh thung. Hun tawp thlengin goal dang a luh belh thei tawh lova, Gunners chuan Mimualah hnehna pawimawh tak changin, an hmahruaina an humhim.
City record siamtu Haaland
Arsenal in King Power Statium-ah hnehna an chan hnu lawk hian champion lai Manchester City chu Vitality Stadium-ah lenglut in, AFC Bournemouth an hmachhawn a, 4-1 a chakin Arsenal an um zui zel. 19-naah awm a, tlahniam thei dinhmuna ding mek Bourne-mouth lakah 4-1 hnehna an chan tuma goal khat thuntu Erling Haaland chuan club record thar a siam a, City tan EPL season khatah goal 27 thun tling thei hmasa ber a ni.
Champion lai City tan hian Julián Álvarez chuan minute 15-na lekah hmahruaina goal a thun. Erling Haaland-a’n na zeta goal bar a pet ber chhawr tangkaiin Alvarez hian awlsam zetin a pet goal. Chak tura rinkai, team lian zawkin hma takah goal an thun vangin mualneitu Bournemouth tan a harsa zui viau a, an mikhualte an nawr let hleithei meuh lo.
Alvarez-a’n goal a thun hnu hian City tan Erling Haaland leh Phil Foden ten goal an thun belh a. Mualneitu player Chris Mepham chuan vanduaithlak takin an lamah a ti-goal hlauh bawk. Si li fai ngawta hnufual zawk an nih hnuin hun tawp dawn hnaih minute 83-naah Jefferson Lerma chuan Bournemouth goal neih chhun a thun ve bawk.
City goal hnihna thuntu Erling Braut Haaland khan EPL season kal mekah goal 27 a thun tling tawh a, EPL season khatah City tan goal thun hnem ber record thar a siam. Kum 2014-15 season khan Sergio Aguero chuan City tan goal 26 a thun a, hei hi City tan season khatah EPL a goal thun hnem ber record a ni thin a, season kal meka goal 27 thun tawh Haland hian Aguero record thaichhiain, record thar arawn siam ta a ni. Haaland hian EPL-ah goal 20 thun tling rang ber record a siam tawh bawk a. Khelh hmabak 13 ngawt an la neih bawk vangin Haaland hian EPL season khata goal thun hnem ber record thar siam theihna hun tha tak ala nei cheu bawk.