Kings in Clippers an hneh

Zirtawpni zinga khelh NBA regular season khelah inkhel hmuhnawm zet mai a awm a. NBA chanchinah inkhel vawi khata point luh tam ber dawttu ni phakah Sacramento Kings chuan an khingpui Los Angels Clippers chu point 176-175 in an hneh.
Western Coference-ah pathumnaa awm mek Sacramento Kings leh panganaa awm mek LA Clippers te hi an inhnehtawk tak zet a, hun pangngaiah an inhnehtawk hnuin, overtime vawi khatnaah chak zawk an awm thei lo chuang lova, overtime vawi hnihnaah harsa takin Kings an chak ta hram thung.
King leh Clippers te hian inkhel tan phat atangin en nawm an lantir nghal a. Quarter khatnaah point 40 ve ve thawkchhuak in, chungnung zawk an awm thei lo phawt. Quarter hnihnaah Clippers an khel tha hret a, point 40 bawk an thawhchhuah nawn leh laiin an khingpuiten point 36 chauh an thawkchhuak thung a, point li-a hmahruai chungin chawlhlawk an hmang.
Second half-ah pawh Sacramento Kings an khel tha chhunzawm a, quarter thumnaah point point 37 thawkchhuakin, point liin an chungnung zui leh a, point 8 a hmahruai chungin quarter hnuhnung ber an hmachhawn. Quarter hnuhnung berah hian Kings in tlawm pumpelh hram tumin tan an khawh a, an chetha zui ta viau. Kings hian tlawm pumpelh tura an mamawh point riat chiah an thawkchhuak a, an khingpuite nih rualin, hun pangngaih point 153 ve ve thawkchhuakin an inhnehtawk phawt.
Hun pangngaiah chak zawk an awm theih loh vangin overtime khelh chhunzawm a ni a, overtime-ah point 11 ve ve an thawkchhuak a, an inhnehtawk leh phawt. Overtime thawhkhatnaah chak zawk an awm theih loh vangin overtime thawh hnihna khelh chhunzawm a ni a, Clippers in point 11 bawk an thawhchhuah laiin Kings in point 12 an thawkchhuak ve thung a. Inkhel hmuhnawm takah point khata chungnung hramin, Sacramento Kings chuan hnehna pawimawh tak an chang zui ta a ni.
Kum 1983 khan Detroit Pistons chuan an khingpui Denver Nuggets chu point 186-184 in an hneh. Pistons leh Nuggets te inkhel hi NBA chanchinah khelh khata point luh tamna ber a ni a. Zirtawpni zinga Sacramento Kings in point 176-175 a Los Angeles Clippers an hneh kha NBA-ah khelh khata point lut tam lamah pahnihna a ni thar.