Zanin hian UEFA Champions League 2023-24 quarter-final khelh zawh a ni dawn a, EPL club lian pahnih; Arsenal leh Manchester City te inlan zan niin, fiahna hautak an hmachhawn dun dawn.
Pathianni zana an mikhual Aston Villa lakah 2-0 a an tlawm vanga EPL-a an hmahruaia hloh Arsenal hi Bayern Munich hmachhawn turin Allianz Arena-ah an lenglut dawn. Gunners leh Bayern hi Emirates Stadium-ah 2-2 in an lo inhnehtawk tawk a, hei vang hian Bayern Munich in semi-final luh theihna hun remchang an nei tha zawka ngaih a ni. An muala inlan tur an nih vangin Bayern hian tantu an nei tha hle ngei dawn a, player 12-na ang hiala sawi thin tantu mipui hi mikhual tan buaina tham a tling ang. EPL-ah an tlawm vangin Arsenal hi insiamthat nghal an tum dawn a, Bayern tan an hlauhawm hun lai tak a ni thei thung.
UCL champion Manchester City chuan he inelnaa vawi 14 zet champion tawh Real Madrid chu Etihad Stadium-ah an mikhual dawn. City leh Real hi first leg-ah 3-3 ngawtin an lo inhnehtawk tawh a, Etihad Stadium-ah inkhel hmuhnawm an phochhuak leh ngei tura ngaih a ni. Real Madrid hian an mualah Santiago Bernabeu-ah tlawm a pumpelh thei hram a, Etihad Stadium-ah an tan chak a harsa lehzual tura ngaih a ni. An muala inlan tur an nih vangin City in inrintawkna sang tak an nei ang a. Real Madrid in Etihad stadium-ah hnehna chan ngei an tum ve bawk ang.
Champions League quater-final second leg hi zanlai dar 12:30-ah khelh tan a ni ang
Arsenal leh City inlan zan
Get real time updates directly on you device, subscribe now.
Prev Post
Next Post