Arsenal leh Manchester City te inlan zan

UEFA Champions League – League round chu zanin dar 11:15 a\angin khelh chhunzawm a ni leh dawn a, zanin hian inkhel pakua a awm ang. EPL club lian Arsenal, Manchester City leh Liverpool te inlan zan a ni a, Real Madrid an inlan dawn bawk.
UCL season kal mekah vawi thum khel tawha tlawm la nei lo Arsenal chu Czech Republic club lian Slavia Prague hmachhawn turin Fortuna Arena-ah an lenglut dawn. Mikhual an nihna hmunah an chak a nih chuan paruknaa awm mek Gunners hi an invawrh sang dawrh thei dawn a. An tlawm a nih erawh chuan an tlahniam duai thei tho thung.
Arsenal khingpui tur Slavia Prague hian vawi thum khel tawhin draw vawi khat nei \awkin chak an la nei lova, 32-naah an awm mek. An mikhual Arsenal lakah an tlawm a nih chuan an dinhmun a chhiat belh hle ngei dawn a, an mualah point hmuh ngei tumin \an an khawh ang.
Arenal in Czech Republic club lian Slavia Prague an hmachhawn laiin Manchester City chu German club lian RB Leipzig hmachhawn turin Red Bull Arena-ah an leng lut ve dawn thung.
City hian vawi thum an khelh a\angin vawi hnih hnehna an chang a, tlawm zawkah vawi khat an \ang tawh. Khelh thum a\anga point 6 hmuin 10-naah an awm mek a. An hmachhawn tur RB Leipzig hi vawi khat chakin tlawm zawkah vawi hnih an \ang tawh thung a, point thum hmuin 30-naah an awm mek. An mualah EPL club lian City an hneh thei a nih chuan RB Leipzig hian table-ah hma an sawn dawrh thei dawn a, chak an tum hle ang.