Art & Culture minister-in YMA khawmpui hmanpui

Nimin khan Pualreng Group YMA Inkhawmpui Vawi-37 na chu Bukpui Pavillion-ah neih a ni a, Art & Culture Minister R.Lalzirliana’n khuallian niin a hmanpui.
Minister chuan Mizoram ti ralmuanga tinuam thintu, chhiatni thatnia tangkai em em YMA-te hnathawh leh inpekna chu fakawm tiin Pualreng Group YMA Inkhawmpui chuan khawtlang tan rah tha a chhuah ngei a beisei thu a sawi a. Mizo tawng uar thar zel a pawimawh thu tarlangin, hnamdang tawng mizo tawng a neih ang angte chu mizo tawng ngei a sawi leh hman thin a tul hle tih a sawi.
A&C Minister chuan hnamdang nupui pasal neih kawngah zirlai pawl MZP, MSU leh YMA-ten zirtirna an kalpui thin chu a fakawm a tih thu a sawi a, chutih rualin hmeichhiate khuahkhirh ringawt chu dik famkim tawk lova a hriat thu sawiin; mipate pawh inenfiah a ngai tih a tarlang a, Mizo hmeichhiate tan pasal a neih tlak ni turin, ruihhloa fihlim, ei leh bar zawn kawngah hmeichhiate rintlak ni tura tan lak thar a ngai a ni, a ti. Khawvelin hmeichhiate dinhmun chawisang tura ke a pen laiin, Mizote hnungtawlh zawnga kal a rem lo a, hmalam pan a hmeichhiate dinhmun chawisang tura ke pen turin YMA-te chu a sawm bawk a ni. Zoram nuam siam tura kalkhawmte chu sawmin Pu R.Lalzirliana chuan ramngaw leh nungchate humhalh kawngah than harh a ngai a ti a, Mizoram ; ngaw tha tak, ramsa leh sava tamna hmun ni thin chu hmuh tur an tlem tawh hle a, ramngaw a chereu zo ta chu a chhunga chengte zir loh vang a ni tiin ram nuam tak nungchate lenna ram a siam leh turin Zoram mipuite a sawm nghal bawk.