Artificial intelligence hman tangkai zir

“Artificial Intelligence based Financial Empowerment for Mizoram” tih thupuia hmangin Ningani khan Mizoram University-ah national level workshop neih a ni.
A hawnna hmanpuitu larsap Dr Hari Babu Kambhampati chuan artificial intelligence-in kan nitin nuphungah nasa takin awlsamna a thlen a, a tha zawng leh a tangkai zawnga ram tan hman a nih theih nan MZU leh NIT Mizoram mithiamte hmalakna a ropui tih a sawi. Mizoram tan bik AI based financial technology projects 11 kalpui mek chu state mila mipui tan chhawr tangkai theih chi nia a hriat thu sawiin, project investigator leh co-project investigator ho thawhrimna leh remhriatna chu mipui tan vanneihna, hnathawh leh khawsak tiawlsamtu a la ni thuai dawn tih a sawi.
MZU leh NIT Mizoram hotute chu hetiang hmalakna pawimawh bikah hian nasa zawka zirbingna kalpui tur leh patent neih belh zel theia tan la turin a fuih bawk.
Department of Science and Technology kaihhruaina hnuaiah National Mission on Interdisciplinary Cyber-Physical Systems chuan IIT Bhilai hnenah Technology Innovation Hub host turin sum a pe a. IIT Bhilai hian financial technology huangah MZU hnenah project 6 leh NIT Mizoram hnenah project 5 kalpuina atan sum a pe a ni.
Seminar hawnna program-ah hian MZU hnuaia project pakhat, “Sustainable Smart Parking Solution for Aizawl City” thlirho a ni a, he mobile application kaltlang hian awlsam zawkin lirthei khalhtuten lirthei hunna tur an hmu zung zung thei dawn a ni. Technical session neih a ni a, MZU-in project 6 kalpui mek thlirhoa sawiho zui a ni.