Artist 100-ah Taylor Swift a la No.1

Taylor Swift chu kar khat chhunga US-a zaithiam lar ber niin, Billboard Artist 100 chart-ah a No.1 a, he chart-a a No.1 tawh zawng zawng chu kar 73 a tling ta chiah a, Artist 100 chart-a No.1 ni rei ber record a siam a sawhnghet leh ta sauh a ni.
Billboard Artist 100 chart hi kar khat chhunga US-a zaithiam lar dan tehna niin, chart ranking siam nan hian kar khat chhunga an album leh hla hralh tam dan te, streaming leh radio airplay te chu tehna pawimawh a ni.
Taylor Swift hian a album thar ‘Speak Now (Taylor’s Version)’ chu Billboars 200 (albums) chart-ah a No.1 pui a, Billboard 200 chart-ah a album 11 langin, chung zinga pali chu top 10-ah an lang, Taylor Swift hi hmeichhe zaithiam zingah tum khata Billboard 200 chart-a album 11 lanpui thei hmasa ber niin, mipa lamah pawh The Beatles leh Prince chiah a pha lo.
Swift hian ‘Speak Now (Taylor’s Version)’ album-a hla 22 bakah hla dang pathum, a vaiin hla 25 te chu Billboard Hot 100 (singles) chart-ah a lanpui thei bawk a, chung zinga hla pahnih chu top 10-ah an lang pha nghe nghe a ni. Hengte avang hian Swift hi tuma el phak rual lohin Billboard Artist 100-ah a No.1 leh ta a ni.
Morgan Wallen chu No.3 atangin No.2 a kai thar leh a, ani pawh hi a hla hit ‘Last Night’ chu Billboard Hot 100-ah a No.1 leh a, he chart-a kar 14 a No.1-na a ni tawh a, Billboard 200 (albums) chart-ah pawh top 10-ah a album pahnih a lang thei bawk a, hei hian Artist 100 chart-ah a vawrh sang ve leh ta a ni.
Country star dang Luke combs chu No.4 atangin No.3-ah a insawn a, SZA chu No.6 atangin No.4-ah insawnin, Peso Pluma chu No.7 atangin No.5-ah a insawn ve leh ta bawk.
Billboard Artist 100 Top 10:
1 Taylor Swift
2 Morgan Wallen
3 Luke Combs
4 SZA
5 Peso Pluma
6 Drake
7 Ed Sheeran
8 Miley Cyrus
9 Lil Uzi Vert
10 Jelly Roll