Artist 100 chart-a kar 70 No.1 ni thei hmasa ber Taylor Swift

Taylor Swift chuan Billboard Artist 100 chart-a No.1 ni ngun ber a nihna record sawhnghetin, Billboard Artist 100-chart-ah a No.1 leh ta, he chart-ah a No.1 tawh zawng zawng belhkhawm chu kar 70 a tling ta chiah a, Billboard Artist 100 chart-a kar 70 No.1 ni thei hman a ni.
Billboard Artist 100 chart hi kar khat chhunga US-a zaithiam lar dan tehna a ni a, chart ranking siam nan hian kar khat chhunga US-ah album leh hla an hralh dan tam dan te, streaming leh radio airplay te chu tehna pawimawh a ni.
Taylor Swift hian a album leh hla hralh that zar a la zo zel a, tunlai hian Eras Tour neiin, North America a hrut kual mek a, he a tour avang hian a album thar bakah a hlui te pawh hralh a kal thar leh hle a, a album thar ber ‘Midnights’, chart-ah pawh No.1 lo ni reng tawh hi kar khat chhunga copy 60,000 hralh lehin No.4 a la ni a, a album dang ‘Lover’ chu No.10 niin, Folklore (No.14), 1989 (No.18), Reputation (No.23), Red (Taylor’s Version) (No.25), Fearless (Taylor’s Version) (No.38), Speak Now (No.39) leh Evermore (No.40) te pawh Billboard 200 chart-ah an lang.
Billboard Hot 100 lamah pawh a hla chart-ah No.1 pawh lo ni reng tawh ‘Anti-Hero’ chu No.12 a la ni a, ‘Karma’ featuring Ice Spice chu No.7 a la ni a, ‘Cruel Summer’ chu No.18 a ni bawk. Heng te avang hian Artist 100 chart-ah pawh Swift hi a No.1 chiang hle a ni.
ATEED pawh No.3-ah an lang thar ve leh a, he chart-a an tawn san ber a la ni. Anni pawh hian a album thar The World EP.2: Outlaw hralh that zar an zo a, he album hi Billboard 200 chart-ah No.2-ah a debut a, he chart-a an tawn san ber a la ni bawk.
Gunna pawh No.5-ah a rawn lang thar ve leh a, ani pawhin a album thar ‘A Gift & A Curse’ hralh that zar a zo a, he album hi kar khat chhungin US-ah 85,000 hralhin, Billboard 200 chart-ah No.3 a ni a, he chart-a a tawn san ber niin, hei hian Billboard Artist 100 chart-ah pawh a vawrh sang ve leh ta a ni.
Queens of the Stone Age No.7-ah an lang a, he chart top 10-ah hian 2017 hnua an lan lehna hmasa ber a ni. Anni pawh hian an album thar In Times New Roman… hralh that zar an zo a, he album hi Billboard 200 chart-ah No.9 niin, Billboard 200 chart top 10-a lang thei album pali an neihna an ni bawk.