Tlawng nut chhan chhui ngenin court hmaah inlan

Tlawng lui nu in mihring leh environment a nghawngnaah, lui tui nut chhan chhuichiang a, dan anga hma la turin court-ah complaint thehluh a ni a. Complaint thehluttute hi Nilaini khan court-ah an thu thehluh sawifiah tura tih an nih angin an inlan.
Centre for Environment and Social Justice hruaitu, environmental activist Vanramchhuangi chuan Tlawng lui nut chhan chhuitir a, a tinutu chunga dan anga hma lak a nih theihna’n Aizawl district chief judicial magistrate (CJM) hnenah criminal complaint a thehlut a. Court hian a thu thehluh hi pawm (admit) in, June 28 khan complaint thehluttu leh thuhretu dangte ‘statement’ a la a ni.
CJM hnena complaint thehluhah hian, Tlawng lui hi Aizawl khawpui tui thianghlim in tura chawmtu niin, tui nu avang hian tui thianghlim supply kawngah PHE Department-in harsatna a tawh phah nasat thu te, loneituten thlai chinna an tui hman tangkai leh nungcha hrang hrang innghahna a nih bawk avangin he lui tih nut hian nghawng a neih zau hle thu te a sawi. Tuna Tlawng lui nut tak chhan an chhuichiannaah, a kam leh bulhnaia bawlhhlawh leh leivung paih nasa lutuk te, tuichhe paih dan mumal loh vangte chu a bul ber nia hriat a ni a, sawrkar hian a tih tur a hlen that tawk loh avanga tun dinhmun hi thleng ta nia a lan thu sawi a ni.
Lui humhalhna kawnga dan tlawhchhan hrang hrang kengkawhtu tur chu state sawrkar a ni a; state sawrkar hnuaiah hian kawng laih leivung paih kawnga mawh phur theitu PWD, Aizawl khawpui huamchhunga bawlhhlawh leh tuichhe paih lama mawh phur theitu AMC leh Aizawl DC te pawhin dan awmsa an kengkawh tha tawk lo nia ngaih theih a ni, tiin, complaint thehluhah hian mawhphurtu (accused/ respondent) a puh tel an ni.
Hei hi ven a, mipui hriselna leh environment humhim a nih loh chuan nghawng chhe zawk nei zel thei a nih avangin, CJM Aizawl district chu a thuneihna huamchhungah Tlawng lui tinutu chhuitir a, a mawhphurtu chunga dan anga hma la turin a ngen tih a sawi.