Taylor Swift chuan Billboard Artist 100 chart-a No.1 ni ngun ber a nihna sawhnghetin, he chart-ah hian a No.1 leh ta a, he chart-a a No.1 tawh zawng zawng belhkhawm chu kar 71 a tling ta. Hetihrual hian Kelly Clarkson, Young Thug leh Peso Pluma te pawh chart top 10-ah an lang e.
Billboard Artist 100 chart hi kar khat chhunga US-a zaithiam lar dan tehna niin, chart ranking siam nan hian kar khat chhunga zaithiamte album leh hla hralh tam dan te, streaming leh radio airplay te chu tehna pawimawh a ni.
Taylor Swift hian a album ‘Midnights’ a tlangzarh hnuah The Eras Tour a nei zui a, a tour boruak a lian tha mep mep bawk a, hei hian a album hlui leh a hla hlui te pawh hralh a tikal thar leh a, tunkar Billboard 200 (albums) chart-ah pawh a album pakua langin, chung zingah chuan ‘Midnights’ chu No.4 a la ni a, ‘Lover’ chu No.9 a la ni bawk. A album dang pasarih chu chart top 40-ah an lang pha bawk a ni.
Taylor Swift hian Billboard 200 chart top 40-ah kar nga chhung chu a album pakua a lanpui tawh a, hetiang tithei zaithiam dang hi tumah an la awm ngai lo.
Billboard Hot 100 (singles) chart lamah pawh Swift hla ‘Karma’ featuring Ice Spice chu No.8 a la ni a, a hla dang ‘Cruel Summer’ pawh No.13 niin, Hot 100 chart-a No.1 pawh lo kai tawh ‘Anti-Hero’ chu No.16 a la ni bawk. Heng te avang hian Swift hi tunkar Billboard Artist 100 chart-ah pawh a No.1 chiang leh hle a ni.
Kelly Clarkson chu chart No.4-ah a rawn lang ve leh a, 2017-a chart No.2 a kai hnua he chart a a thlen san leh ber a la ni. Clarkson pawhin a album thar ‘Chemistry’ hralh that zar a zo a, he album hi Billboard 200-ah pawh No.6-ah a debut nghe nghe a ni.
Rapper Young Thug pawhin a album thar ‘Business Is Business’ hralh that zar a zo a, he album hi a tlangzarh karah US-ah 89,000 hralhin Billboard 200 chart No.2-ah a debut a, hei hian Artist 100-ah pawh vawrh dangin, No.5 a ni a, he chart-a a tawn sân ber a la ni.
Peso Pluma pawh No.13 atangin No.6-ah a invawrh a, he chart-a a tawn san ber a la ni. Ani hian a album thar ‘Genesis’ hralh that zar a zo a, he album hi Billboard 200 chart No.3-a a debut a, hei hian Artist 100 chart-ah pawh a vawr sang ta a ni.
-- Advertisement --
Billboard Artist 100 Top 10:
1 Taylor Swift
2 Morgan Wallen
3 Luke Combs
4 Kelly Clarkson
5 Young Thug
6 Peso Pluma
7 SZA
8 ATEEZ
9 Ed Sheeran
10 Drake