Asia chhimchhak ramte chuan Myanmar-a sipai sorkar ding mek hnenah an ram tual chhung indona kara inthlan huaihawt chu thil pawimawh hmasa ber a nih loh thu leh inbiaa a rang thei ang bera buaina titawp zawk turin an hrilh.
Pathianni khan Association of Southeast Asian Nations (ASEAN) foreign minister theuhte chuan an member zinga mi, Myanmar chu indona titawp turin an ti a, an ram aiawha tel hnenah mihring mamawh thil duh ang tawk a awm thei lo chu a awm theih nana tan la tur -in an ti tih intawh khawm thlengtu, Malaysia foreign minister chuan a sawi.
“Malaysia hian Myanmar hi a ngaihtuah em em a ni,” tiin Mohamad Hasan chuan Langkawi thliarkara ministerial retreat neihnaa thuthar lakhawmtute hmaah a sawi.
ASEAN thutkhawmah hian Myanmar chuan an sipai hruaitute a tirh ve phalsak an nih loh avangin an foreign ministry-a hotu sang tak ni lem lo chu an aiawh turin an tir a. Hasan-a chuan an mi tirh hnen atang hian kumina inthlan huaihawt an tum dan tawi tê an ngaihthlak thu a sawi a; mahse, ram tangrualte hian Myanmar sorkar hian inthlan aiin muanna dah pawimawh hmasa turin an duh zawk tih an hrilh tih a sawi.
“Inthlan hi thil pawimawh tak a nih tih chu kan hrilh a. Huam zim tê-a tih theih a ni lo va, tel ve tur tam tak an awm a ni,” a ti a. “Inthlan hi kan ngaih pawimawh hmasak ber a ni lo va, tharum thawhna thleng mek tihtawp zawk hi a pawimawh a ni tih kan hrilh,” a ti.
Myanmar hi kum 2021 tir lama sipaiten mipui thlan sorkar, Nobel Peace Prize lo dawng tawh, Aung San Suu Kyi-i kaihhruai an paih thlak hnuah khan mipui rorelna ram duhtu pawl tam takin sipai duh lohna an lantir a. Hel anga che zuiin an ram hmun tam tak chu helho hian an thunun tawh a ni.
Kil hrang hrangah buaina an tawk a, an ram eibar dinhmun a chhe em em a, political party tam tak khap an ni bawk a, heti chung hian sipai sorkar hian kuminah inthlan huaihawt a tum a. Hei hi mi tam takin an sawisel a, sipai hotuten thuneihna an chan ngheh zelna atana an ruahmanna mai mai niin an ngai.
Ram 10 telna, ASEAN-ah hian kuminah Malaysia hi hruaitu a ni mek a. Myanmar buainaa palai (special envoy) atan ram palai hna lo thawk tawh thin, Othman Hashim chu an ruat tih a puang bawk.
Myanmar-ah hian United Nations chuan mihringin puihna an mamawh dan chu a sang tawh hle tih sawiin mi maktaduai 20 dawn, an ram mipui hmun thuma thena hmun khat chuang chuan puih an mamawh tak zet tih an sawi.
Mohamad chuan palaia ruat, Hashim-a hian Myanmar hi ‘a tlawh thuai dawn’ tih sawiin ASEAN-in muanna a awm theih nana rahbi a tuk panga (five-point peace plan) a hlawhtlin theih nan a kaihhnawih mi hrang hrang a kawm ang a. Rahbi tuk hi duan a nih atangin a taka kalpui a la awm mang lo a ni.
ASEAN-in inthlan aia buaina tihtawp ngai pawimawh turin Myanmar ti
Get real time updates directly on you device, subscribe now.
Prev Post
Next Post