Damlo enkawl

Tun hnaia District Hospital Siaha-a Daniel Lalruatfela (24) boral chung changah, damlo enkawltute inthlahdah vanga ngaih theih thil a thleng a. Hemi chungchang hi chhui chian mek a nih avangin mipui lam pawhin boruak tipunlun zawnga social media lama comment siam chiam lo tura kan insum a thain a rinawm.
Damlo enkawl chungchangah hian Mizorama damdawi lama kan mithiam doctor, nurse, lab technician etc. te hi, tunhma ai chuan hma an sawn nasa ta hle a tih theih ang. Hetih lai hian, mi pahnih khat inthlahdahna hian pawi a thlen nasa thei hle bawk. Mihring hriselna enkawl hi ‘thih leh dam’ inkar a nih avangin, a nghawng a na awl bik a, mipui pawhin thikthu an tichhe hma bik a tih theih bawk ang.
Siaha damdawi ina thil thleng chungchangah hian Centre for Environment & Social Justice chuan Indian Public Health Standards (IPHS) kalpui ve tura Mizoram sawrkar an phut thu an auchhuahpui nghal a. Tun dinhmunah hian, Siaha district hospital-ah, IPHS norms anga medical officer 32 awm tur a nih laiin, 10 an awm a, nurse 52 awm turah 28 an awm a, khum 114 awmah function lo tam tak a awm tiin, hetiang hi district hospital dang dinhmun a ni tlangpui tih an tarlang bawk.
IPH Standard hi zawm theih chuan a tha, mahse keini Mizoram ang tan hi chuan IPHS ang diak diaka kalpui hi chu vana rah ang a ni deuh mai awm e; kan state economy han en hi chuan.
Nursing Council of India-in Nurse Patient Ratio a siam dan chuan staff nurse pakhatin, normal ward-ah khum paruk (6) a enkawl tur a ni a, special ward-ah nurse pakhatin khum pali(4) a enkawl tur a ni, tih a ni tawp mai a. Hei phei hi chu Mizorama district hospital-te hian an zawm pha lo hle a tih theih awm e. Hei hi sawrkarin a ngaihthah vang em em pawh a ni bik chuang lo ang a, norms anga kal te chu sawrkar hi a duhtu hlei hlei a ni ngei ang. Norms kan zawm pha lo a nih chuan, damlo enkawltute an hah dawn a, damlo enkawltute an hah chuan a tuartu tur chu damlote bawk an ni. Norms ang diak diak kan zawm pha lo a nih pawhin, mihring hriselna enkawl thil a nih avangin sawrkar pawh hian ngaihpawimawh hmasak bera a neih a tul a ni.