ASF 3-naah vawk 1200+ thi tawh Vawk dam lo nei, test duh lo tam

Vawk natna hri, African Swine Fever (ASF) chu a thawh thumna atan Mizoramah a leng leh mek a. Hri avang leh hri kai nia rinhlelhawm avanga tihhlum nen vawk 1200 chuangin an thih phah tawh. Hetihlai hian vawk damlo, he hri kai nia rinhlelh si, a vulhtuten test an duh loh a awm nual nia sawi a ni.
AH & Vety department lam chhinchhiah danin, ASF leng thawh thumna hian Mizoram district 6 – Champhai, Aizawl, Kolasib, Mamit, Lunglei leh Khawzawl a tuam tawh a, Champhai district hi a rawn chhuah tanna leh a khawih nat ber a ni. Lunglei leh Khawzawl hi chu veng pakhat ve ve chauhah hmuhchhuah a la ni.
Champhai district-ah hian veng/khua 10 vel a tuam tawh a. ASF vanga vawk thi 200 vel leh he hri kai nia ngaih vawk tihhlum 200 vel tho a awm tawh. Kolasib district-ah khua/ veng 4 a tuam tawh a, Kolasib khawchhung Khuangpuilam leh Diakkawn bakah district chhung Meidum leh Bairabi a ni a, thihpui leh tihhlum erawh 100 an la tling lo a ni.
Aizawlah pawh Ramhlun Sports Complex, ITI Mualpui leh Salem Vengah te hmuhchhuah a ni a, Aizawl district Sateekah hmuh a ni tawh a; thihpui erawh 10 chuang awrh an ni. Mamitah chuan veng pathumah hmuh a ni tawh a, an ni pawh thihpui an la tam lo.
Lunglei leh Khawzawl hi veng pakhatah chauh hmuh la ni mah se, tam thama vawk vulhna hmun a nih avangin thihpui leh tihhlum an tam hle thung a, ASF thihpui 200 chuang ve ve leh, tihhlum 100 chuang ve ve a tling.
Hetihlai hian ASF hrileng thar leh mekah vawk vulhtute zingah an vawkin hri an vei leh vei loh test duh lo an tam tih AH&Vety department hotute chuan chuan The Aizawl Post zawhna an chhang.
Vawk hri danna tur vaccine ala awm loh avangin fimkhur chu inven na tha ber a ni tih an sawi a. Vawk in leh a vel vawnfai, vawk ina midang kal tir loh bakah chaw ningnawi pek loh a him ber tih an sawi. Vawk hri (ASF) vei ni ngei an hriatte pawh a neituten an la dam that deuh laia talh zel an duh avangin test an phal lo thin tih an sawi bawk.
ASF a rem theih nan department atanga hmalakna vak ngaihna a awm lo niin an sawi a. Vawk thi zat an report thin bakah a hri vei tawhte an tihhlum sak thin tih an sawi. Vawk hri vei leh vei lo test nan pakhat zelah Rs.700 a ngai thin a, mahse a thlawnin an test sak tih an sawi. Vawk dam tha lai, natna neilote pawh a hri an kai leh thei a, chutihlaiin, vawk talh turte chu hri an kai leh kai loh endik hmasak sen a nih loh avangin an endik ngai lo tih an sawi a ni.