Hriselna lama ruahmanna thar Ayushman Bhava kalpui tan

Hriselna kawnga sawrkar laipui ruahmanna – Ayushman Bhava Campaign chu Nilaini khan India President Droupadi Murmu chuan ram puma kalpui turin a hawng a. India ram hmun dang ang bawkin Mizoramah pawh inbiak hmuhtheihna hmanga chhimin hemi pual hian hun hman a ni.
Aizawlah chuan larsap Dr Hari Babu Kambhampati leh Health & Family Welfare minister Dr R Lalthangliana hoa hmanin Mizoram bik atana khuhhawn a ni.
Larsap chuan Ayushman Bhava hmang hian nasa takin beihpui thlak a ni dawn a. Khawtinah leh mitin banphakin healthcare service hrang hrang chhawpchhuah leh hemi kawnga mamawhna zawng zawng tihhlawhtlin vek tum a ni tih a sawi.
“Kan ngaihven vak loh, inkaichhawn theih ni chuang si lo, kan khawsak phung leh ei leh in kan uluk loh avanga natna hrang hrang mi tamtakin kan vei – zunthlum, thisen sang, cancer, lung natna, chuap natna leh a dangte hi mi tam takin an thihpui mek a. Hemi kawngah hian uar zawka inzirtir a ngai,” Dr Hari Babu Kambhampati hian a ti.
Health department leh a kaihhnawih department dang hotute chu Ayushman Bhava Campaign hnuaia health care scheme leh service hrang hrang bakah social security scheme dang a mamawhtuten an dawn theihnana thawk turin a chah.
Health minister pawhin Ayushman Bhava Campaign chu theihtawp chhuaha kalpui a ni dawn tih a sawi a. Mimal, pawl, kohhran leh khawtlang anga thawpuina tha a awm phawt chuan a hlawhtling ngei dawn tih a sawi a ni.
Ayushman Bhava Campaign thil tum tihlawhtling turin Health department sum leh pai bakah a thawktute chu a tawk lo maithei tih Dr R Lalthangliana hian sawiin, “2024 March-ah chuan Mizorama thingtlang khua zawng zawng hi ‘Khaw Hrisel (Healthy Village)’ a puan kan tum a. Ka thil tum a hlawhtlin theih nan kan zavaiin theihtawp chhuah a, thawkho turin kan insawm a ni,” a ti.