ASF hrileng a zia hret hretah ngai

Mizoram tibuai mektu African Swine Fever (ASF) hrileng a zia hret hretah ngaih a ni a, AH&Vety department chuan he hrileng hi a hma anga nasa a ni tawh lovah an ngai.Ni tinin ASF vanga vawk thi leh tihhlum la awm mah se AH&vety department lam chuan vawk thi zat hi a tlem hret hret tih an sawi a, ni tina vawk thi zat an chhinchhiaha lo langah hian khami ni-a thi ni lo, a hma deuh tawha mi, report dawn har vanga lang tlai khawhnu te a awm nual \hin thu leh, chumi chhiar tel loh chuan ni tina vawk thi zat hi a tlem tawh tia sawi theih a nih thu te an sawi.
An chhinchhiah danin, September ni 2 thleng khan kuminah ASF vangin vawk 11545 a thi tawh a, ASF vangin vawk 20113 tihhlum a ni tawh. September ni 1-ah khan vawk 44 a thi a, vawk 58 tihhlum a ni bawk. September ni 2-ah vawk 52 a thi a, vawk 80 tihhlum a ni. A vanglaia ni khata vawk thi zat leh vawk tihhlum zat nena khaikhinin tunah chuan a tam tawh lo an ti.
Kumina ASF hri an hmuhna hmasaahte khan a reh tawh a, a la reh fel chiah lohna hmunah pawh a zia tawh tih an sawi a, finfiah tharna hmun pawh a pung lo a, hmuh tharna a awm meuh tawh lo an ti bawk.
ASF a nih leh nih loh enfiah ngai pawh a tlem tawh tih an sawi a, hman ni lawk thleng te kha chuan khawih sen loh a awm a, tunah chuan chutiang a ni tawh lo tih an sawi.
Vawk a thi hnem tawh hrim hrim a, chuvangin hri pawh a zia tawh ang tih ngaihdan a awm a, AH&Vety department hotute chuan vawk a la tam thu sawiin, vawk dam lo leh rinhlelhawm, endik ngai hi a tlem tawh hrim hrim zawk an ti.