ASF hrileng a zia thei rih lo

Vawk natna African Swine Fever (ASF) hri a leng mek a, a zia thei rih lo. A kal mar rih a, ni tina vawk thi zat pawh a la tam tham thin hle.
June ni 1 thleng khan kuminah ASF vangin Mizoramah vawk 1187 a thi a, ASF vangin vswk 1917 tihhlum (cull) a ni. July ni 1-ah chuan ASF vanga vawk thi zat hi 4068 a tling tawh a, vawk tihhlum zat pawh 7871 a tling.
Thla khat vel chhungin chutiang khawp chuan vawk thi zat a pung a, July ni 31-ah phei chuan vawk thi zat hi 8251 a tling tawh. Vawk tihhlum zat pawh 15306 daih a ni tawh.
“A vanglai a la ni. Rin aiin a vanglai hi a rei a, a tlahniam rih lo,” AH&Vety department hotu pakhat chuan a ti.
AH&Vety department lam chuan an rin aiin a vanglai a rei tih an sawi a, a tlahniam dawn hnai em tih pawh hriatthiam a har rih thu an sawi bawk.
Tun hnaiah Lunglei khawpui chhungah ASF hi veng hrang hrangah hmuh a ni a, hei hi a darh hluai a nih chuan vawk thi zat hi a pung thur thur thei tih an sawi. Amaherawhchu, Lunglei khawpuiah hian a darh hluai lo thei tho tih pawh an sawi.
An sawi danin, tuna a kal danah chuan kumina hri hmuh hmasaknaah hrileng hi a zia a, mahse hmun dangah a darh mek thung. Kuminah hian Champhai district-a Leithum leh Vanzau-ahte ASF hi hmuh tan a ni a, anni hi chu an zia tawh. Aizawl khawpuiah a darh leh a, Aizawl khawpui pawh hi a darh tawh. Mahse hmun dangah a kangkai zel rih.