ASF hrileng kal mar rih

Mizoramah vawk natna African Swine Fever (ASF) a leng mek a, he hrileng hi a kal mar hle; nikum lam atangin a la tawp lo.
He hrileng mek hi a thawh thumna a ni a, nikum kum chawhma lama intan tawh kha niin, kum thar hnuah pawh a la reh lo. Kuminah a thawh thumna hi a la reh lo mai a ni lo a, April vel atang khan a hluar thar leh.
ASF hi 2021-ah Mizoramah hmuh a ni a, AH&Vety department-in an chhinchhiah dan chuan, 2021 kum tir lam atanga 2022 February thlenga hrileng kha a thawh khatna a ni. 2022-ah hian a thawh hnihna a leng leh a, February thla chawhnu lama intan kha December ni 22-ah a tawp. 2023-ah a thawh thumna a leng leh a, 2023-a an finfiah hmasak ber chu May ni 6-a mi niin, chu chu tawp lovin a la leng ta zel a ni.
2023 May thla atangin a thawh thumna a leng a, kumin April vel atangin a zual tih chu AH&Vety department hotute sawi dan a ni a, vawiin thlengin a la zual zel nia ngaih a ni.
Hetia kumin April vel atanga hrileng a hluar hi, a chhan chiang faka sawi theih a nih loh thu an sawi a, hmun thenkhat, a bikin Aizawl khawpuiah a hmaa lo inmun tawh kha a rawn chhuak ta nia ngaih a nih thu an sawi.
Tuna hri hluar chhan pakhat an sawi chu, vawk thi lo paih mai mai an awm vang tih a ni.
Nikum lam, a thawh thumna tir lamah khan Champhai district-in an tuar nasa a, kuminah chuan Champhai district hi a tuar na lo pawl an ni rih. Leithum leh Vanzau-ah chauh ASF hi hmuh a la ni a, Leithumah vawk 25, Vanzauvah 17 a thi tawh. Heng khaw pahnihah hian ASF vanga vawk tihhlum a awm nual tawh bawk a, Leithumah 13, Vanzauvah 56 tihhlum a ni tawh.
Champhai district an zia laiin nikum lama tuar nasa lo Aizawl district-ah a hluar thung a, AH&Vety department hotute chuan hrilen nasatnaah hian a hnuah a zia thin tih thlir dan a awm thu an sawi.