ASF-in Aizawl tuam zau tial tial

Vawk natna hrileng, African Swine Fever chuan Aizawl khawpui a tuam zau tial tial a, veng paruk a luhchilh tawh nia hriat a ni.
Tunhnaia ASF leng tharah hian a tirah Champhai district-a Leithum leh Vanzau, Lunglei district-a Buknuam leh Andermanik bakah Saitual district-a Mimbung bakah Saitual khawpui te, Khawzawl district-a Dulte khua te chu a len na hmasa deuh a ni a. Champhai district leh Lunglei district-a a lennaah hian ziaawm lam a pan a, heng district pahniha khaw dangah a len darh awm hriat a ni rih lo bawk. Saitual khawpui leh Khawzawl district-a Dulte ah te chuan hri hi a darh belh zel mek thung.
Hetihlai hian Aizawlah chuan Salem Veng leh Kulikawn chu ASF lanchhuahna hmasa an ni a, veng pahnih hi ‘infected area’ ah pawh April 17 khan puan an ni tawh. Tun thlengin ASF vanga vawk thi hi Salem Vengah 35 leh ASF kai nia ngaih tihhlum/ suat pakhat an nei a; Kulikawnah ASF vanga thi 45 leh suat 22 an nei tawh.
Hemi hnu hian Maubawkah ASF kai nia hriat vawk pali chu tihhlum a ni a; he natna avanga vawk thi, tia puan theih erawh an ni hian an la nei lo. Dinthar Vengah ASF vanga vawk thi nia finfiah pahnih an awm tawh bawk.
April 27 hnu lamah Armed Vengah ASF kai vawk thi an awm ve leh a, Khatla Southah ASF kai nia ngaih vawk tihhlum an awm bawk. Armed Vengah hian nimin lam thleng khan vawk 17 a thi tawh a, Khatla Southah hian ASF vanga vawk thi report a la awm lo chungin, ASF kai nia hriat vawk pahnih tihhlum an ni tawh a ni.
Tun thlengin heng district 5-a ASF vanga vawk thi hi 336 an ni tawh a, ASF kai nia hriatchian, tihhlum hi vawk 112 an awm tawh.