Mizorama African Swine Fever leng leh mekah he hri avanga vawk thi/ tihhlum chu sang hnih a chuang ta. AH & Vety department-in kumin bikah May 21 thlenga a chhinchhiah chinah ASF vanga vawk dam lo thi 870 an ni tawh a, ASF kai nia ngaih vawk tihhlum/ suat 1143 awm tawhin, tun thlenga he hri avanga vawk thi hi 2013 an tling ta.
Mizorama ASF hrileng thawh thumna hi 2023 May atang khan a intan tawh a, December thleng khan vawk 1039 a thi a, 928 suat a ni. Hemi nena chhut telin ASF hrileng thawh thumnaah hian ASF vanga damlo vawk thi 1909 leh ASF kai nia hriat vawk suat 2071 a awm tawh a. Belhkhawmin ASF leng thawhthumnaah vawk thi 3980 an tling tawh.
Kumina lengah hian Aizawl district chu a tuar na ber a ni a, Aizawl khawpui chhung bik pawh a ni telin a tuam zau tial tial a ni. Aizawl district tih lohah Khawzawl district chu a tuar na ber a ni a, Dulte chu he district-a tuar na ber ni lehin, tun thlengin ASF vangin vawk 154 an thi tawh a, vawk 14 suat an ni tawh. Serchhip district-a Chhingchhipah ASF vanga thi 17 leh suat 133 an nei tawh bawk. Hri lanchhuah tan tirhna zing ami Champhai district-a Leithum leh Vanzau bakah Lunglei district-a Andermanik leh Buknuamah chuan hun rei tak chhung vawk thih belh emaw hri kai thar emaw hriat tur a awm loa, heng district-a khaw dangah pawh ASF hi a darh zui rih lo.
Thawhlehni khan AH & Vety minister C Lalsawivunga hoin ASF hrileng dinhmun thlirlet leh hmalakna tur sawi hoin thutkhawm a ni a. tun dinhmunah hri a la kiam lo a, vawk damlote enkawlna damdawi mumal a awm loh avangin department chuan vawk vulhtute hriat tur leh zawm tur an chhuah thin a ni.
Vawk damlo leh thi ASF an nih leh nih loh finfiah nghal turin department laboratory atanga confirm mai theih a ni loa, ASF hi scheduled disease zing ami a nih avangin, central guideline anga confirm tur chuan NIHSAD Bhopal emaw NERDDL Guwahati emawa thawn tur a ni. Hei vang hian test result chungchangah hma lak zung zung theih a ni lo, tiin, department chuan mipui hriatthiamna a ngen.
ASF vangin vawk 2000 thi tling ta
Get real time updates directly on you device, subscribe now.
Prev Post
Next Post