Vawk natna hri, African Swine Fever (ASF) leng mekah vawk sang chuang a thi tawh a, a tam zawk chu he natna kai thihpui an nih laiin, kai nia ngaih, a len darh zel lohna tura tih hlum/ suat an awm nual tawh bawk.
May 13 thlenga AH & Vety department chhinchhiah danin, Mizoram district paruk – Champhai, Khawzawl, Saitual, Serchhip Aizawl leh Lungleia khaw thenkhatah ASF hi a lut tawh a, Champhai, Lunglei leh Saitualah hi chuan khaw pahnih vel theuh bak a luh tharna emaw a darh zau zelna emaw hriat tur a awm tawh lo.
Hetihlai hian Aizawl khawpui leh a chhehvelah hri hi a darh nasa zual a, Khawzawl district-ah pawh a darh tial tial a ni.
Aizawl khawpui bikah ASF hian veng 19 a tuam tawh a, Aizawl bulhnai khaw 6 bakah Thingsul Tlangnuam leh Darlawngah te a lut tawh bawk. Khawzawl disrtict-ah Dulte atanga intanin, khaw thum dangah a luh belh tawh a; Serchhip district Khumtung leh Chhingchhipah ASF a lut tawh a ni.
Dulte hi a khua/veng anga vawk chan nasa ber an ni ta a, ASF vanga thi 136 leh suat 14, a vaiin vawk 150 an thih phah tawh a. Kulikawn chu pahnihna niin, ASF thihpui 61 leh suat 85, a vaiin 146 an thi tawh. Edentharah vawk 50-in thihpui tawhin suat 45, a vaiin 95-in an thih phah tawh bawk.
Heti hian tun thlenga ASF thihpui vawk 684 leh suat 387 an awm tawh a, a vaiin vawk 1071-in an thih phah tawh. May 13 bikah khan ASF thihpui 11 awmin, 56 suat an ni.
ASF vangin vawk sang thi tawh Aizawl leh Khawzawl tuam na
Get real time updates directly on you device, subscribe now.
Next Post