Asia Cup chawia nakkum hockey world cup khel tur India

Asia Cup chawia nakkum hockey world cup khel tur India
Rajgir, Bihar-a men’s Asia Cup hockey tournament khelh zawh tak Pathianni final-ah a thlengtu India chuan 4-1 tehrenga defending champion South Korea sawp chungin nakkum FIH World Cup khel turin an dinhmun an sawhnghet nghal.
Tarlan tawh thin angin, Asia Cup hockey tournament-a mipa leh hmeichhe team champion ve ve hi nakkum hockey world cup khel turin an tling nghal dawn tih tarlan a ni tawh a; India chuan nakkum August 14-30 chhunga Belgium leh Netherlands rama hockey inelna lian ber hmachhawn turin an tum an hlenchhuak ta phawt a ni.
Nimin lama tarlan tawh angin, China rama Women’s Asia Cup khelh mekah Lalremsiami Hmar telna India hmeichhe hockey team chuan nizan khan an pool B match thumna leh pool match tawpna ni nghalah Singapore an hmachhawn a, 12-0 teh meuhin an sawp leh!
He inkhelah hian India chu engkimah an chungnung zawk hle a; he tournament-a India match hmasa bera Thailand laka goal lo khung tawhtu, Mizo nula Lalremsiami chuan Singapore lakah pawh hian India goal thumna a thun leh bawk.
He match-ah hian Navneet Kaur leh Mumtaz Khand-te chuan India tan goal thum ve ve an khung bawk.
Heti hian, India chu Pool B-ah sang berin, chiang takin super 4 stage an lut a ni.
World number 10 India hian an bultanna inkhelah 11-0-in Thailand an sawp a; a vawi hnihnaah champion lai Japan nen 2-2-in an inhnehtawk a; September ni 14 final lut tura beisei an ni phawt a, an champion chuan mipa team hnungzuiin Belgium leh Netherlands ramah 2026 Women’s World Cup an khel ang.
Mipa team lamah kirleh ila…
Men’s Asia Cup hockey tournament final-a Korea hnehtu India khan kum riat hnuah Asia Cup hlawhtlinna an chang leh ta hram a; vawi li an champion-na niin, vawi nga champion tawh South Korea tih loha he tournament-a team hlawhtling ber an ni mek.
India kuta Asia Cup title a luh hnuhnunber chu kum 2017 Dhaka kha niin, a hmain kum 2003 (Kuala Lumpur) leh 2007 (Chennai)-ah khawmualpui huap trophy hi an lo sualchhuak tawh bawk a ni.
Pathianni final-ah India tan Dilpreet (28th, 45th minutes) chuan goal hnih khungin, Sukhjeet Singh (1st) pawhin field goal khat a thawh ve bawk a; India goal khat dang hi penalty corner atanga Amit Rohidas (50th)-a tihluh a ni.
Rajgir Sports Complex-a Korea goal neihchhun kha minute 51-a Dain Son-a hlapluh a ni.
Men’s Hockey Asia Cup 2025-ah hian a thlengtu India hi Pool A-ah awmin, pool match an khelh vawi thuma an chak vek hnuin Pool A leh B atanga a sang palite inkhelhna Super 4s stage lamah pawh tlawm nei loin an tlang zel a; final hmaa an match hnuhnung berah Inrinni zan khan 7-0 ngawtin China an lo sawp tawh bawk a ni.
China lakah Shilanand Lakra (4th minute), Dilpreet Singh (7th), Mandeep Singh (18th), Raj Kumar Pal (37th), Sukhjeet Singh (39th) leh Abhishek (46th, 50th)-te’n goal an khung.
World number 12 Malaysia chuan pathumna zawnna inkhelah 3-0-a world No. 22 China hnehin pathumna an hauh a; 6-1-a world No. 28 Bangladesh sawptu world No. 18 Japan chu pangana an ni.