Asian Athletics C’ship-ah India 3-na

Asian Athletics C’ship-ah India 3-na
July 12-16, 2023 chhunga Thailand khaw-pui Bangkok-a zawh fel tak Asian Athletics Championships-ah India chuan gold medal paruk, silver 12 leh bronze medal pakua rut chungin a pumpuiah medal 27 nen pathumna an luah.
Kum 2017 khan Asia khawmualpui huap intih-siak lian hi India chuan thlengin, khami tum khan medal 27 nen India chuan championship a khar a, he inelnaa India chetthat ber tum niin, khami tuma India record kha kumina Indian contingent hian medal lak tam lamah an tluk leh ta chiah a ni.
Medal table-a India chung chiah luahtu Chi-na (22) chu a pumpuiah pahnihna niin, gold medal (16) leh medal belhkhawm (37)-a sang ber Japan chu team champion an ni.
India tana chhinchhiah-tlak tak pakhat chu medal tally-ah China pha lo mah se medal lak pumpui belhkhawmah an sang zawk ve tlat!
India tana gold medal paruk hawntute chu Jyothi Yarraji, Parul Chaudhary, Tajinder Pal Singh Toor, Abdulla Aboobacker, Ajay Ku-mar Saroj leh mixed relay team niin, mixed relay team member-te hi Rajesh Ramesh, Ai-shwarya Mishra, Amoj Jacob leh Subha Ven-katesan-te an ni.
Thailand intihsiak lianah hian a tawp khar ni, Pathianni khan India hian 4×400 mixed relay-ah gold awrhin, India tana inlan Amoj Jacob, Aishwarya Mishra, Rajesh Ramesh leh Su-bha Venkatesan-te thlen chin (3:14.70) kha natio-nal record a ni nghal.
C’ship tum 25-na zawh fel takah khan Jyothi Yarraji chu gold medal awrh hmasaber niin, karliamta Ningani daih tawh khan women’s 100m hurdles-ah major international event-a yellow metal a dawn hmasak ber a hlawh-chhuak a, Supachalasai Stadium-a he tlankawng zawh zo tur hian second 13.09 hmangin, a hnung chiahah Japanese runner pahnih Terada Asuka (13.13s) leh Aoki Masumi (13.26s)-te an indawt ve bawk.
Kum 23 mi Yarraji lo lan hma zawngin hun rei tak chhung chu he cham-pionship-a women’s 100m hurdles hi Japa-nese leh Chinese mite’n an awpbet nghet tlat a, Thailand ramah a na-tional record (12.82 seconds) pha lo mah se Yarraji a lo lang a, Japanese pahnih um phak lohin a thleng.
Yarraji hian thla hmasa khan National Inter-State Champion-ship-ah second 12.92 chhungin women’s 100m hurdles hi a tlanchhuak hman a, chu pawh chu Bangkok khuaa a gold awrhna hian a pha lo!
India tan Ajay Ku-mar Saroj pawh tactical race pui tak nena inlanin men’s 1500m gold nen Asian Athletics Championship a khar a; Commonwealth Games silver medallist Abdulla Aboobacker pawhin men’s triple jump event-ah yellow metal a awrh ve bawk.
Ningani kha Indian contingent tan ni duh-awm niin, Quartermiler Aishwarya Mishra (53.07 seconds) leh Tejaswin Shankar-te paw’n India tan medal an sualchhuak a, Mishra hian women’s 400m final-ah bronze awrhin, Shankar hian gruelling men’s decathlon-ah bronze bawk a dawng. Aishwarya leh Tejaswin tan tun kha an medal lakna event ve vea international kawtkaia an inlan vawikhatna leh international medal an lak vawikhatna a ni.
Tejaswin hian 2022 Commonwealth Games-ah khan high jump bronze lo awrh tawh mah se nikum atang khan decathlon lamah a inlet ta a ni.
India medal pathum-na leh gold pahnihna ni nghal chu kumin May thlaa USA lama zu train Ajay Kumar Saroj hlawhchhuah niin, Ajay hian 1500m intlansiak tlankawng chu minute 3:41.51 chhungin a zo.