Asian Games-ah India hockey team hnih chak nghal ve ve

Asian Games-ah India hockey team hnih chak nghal ve ve
Women’s hockey tournament lamah Mizo player pahnih Lalremsiami leh Lalthantluangi telna Indian women’s hockey team chuan si 19 fai tehrengin an pool match hmasaberah Uzbekistan an sawp a; mipa lamah defending champion India pawhin Asian Games hockey campaign bul an tan khawng leh nghal at a, 13-1 zetin Indonesia an sawp ve bawk!
Hmeichhe lamah India tan Deepika chuan goal riat thawh tlingin, veteran goalkeeper Savita Punia pawhin mimalin mellung thar a phun a, tun kha ram tana match 320 a khelh tlinna chiah niin, ti hian, Vandana Katariya nen Indian woman hockey player zinga ram tana khel hnem ber an ni dun ta a ni.
Asian Games hmeichhe hockey bika ranking nei sang ber dawttu India nulate hian nimin khan Kakamilgahara, Japan-ah Pool B bul an tan a; beisei lawk ang ngeiin Uzbekistan defence an paldarh hneh kher mai!
Goal hmahruai hi minute sarihna leka Siami thun niin, a chipui Tluangi pawhin goal hnih a thawh ve bawk.
India hian vawiinah Indonesia an hmachhawn zui leh ang.
Mipa hockey inelnaah champ lai India chuan Pool A bul an tanna match-ah goal 13 thunin, si khat an chhuah ve palh a; langsar ber striker Dilpreet Singh chuan field goal li a thawh.
India team pahnih hian tunhma lama jersey pawl an hak thin (traditional blue jersey) kha kalsanin BJP rawng an tih mai (primary saffron kits) an ha ta a, hei hi squad pahnih chhunga danglamna langsar niin, team thawmhnaw rawng thlak hian inhnialna pawh a lo chawkchhuak laih tawh a ni.