Aspirational Block titha ber nihtheihnaah thawktute lawmpui

Aspirational Block titha ber nih
theihnaah thawktute lawmpui
NITI Aayog hnuaia aspirational block hmasawnna tura inelna ‘Sampoornata Abhiyan’ a Ngopa Block atanga hna thawk thate lawmpuina – Sampoornata Abhiyan Samman Samaroh chu Thawhtanni khan Saitualah neih a ni.
Hmanpuitu Commerce & Industries minister F Rodingliana chuan NITI Aayog-in aspirational block hmasawnna tura inelna a buatsaihah Ngopa RD Block a titha ber leh Mizorama NITI Aayog tehfung 6 tihlawhtling vek thei aspirational block awmchhun a ni chu lawmawm a tih thu a sawi a. He dinhmun thleng tura kaihruaitu bawrhsap leh a thawhpuite, BDO leh line department dang – Health, ICDS leh Agriculture thawhrimna avangin lawmthu a sawi a ni.
Ngopa Block chu block hnufual, chawikan ngai a ni reng tur a ni lo, tiin, he dinhmun atanga tal chhuak tur chuan kil tinah tanho a ngai tih a sawi. “Ngopa RD Block-a khaw tinah hmun dang aia thlai tha duh bik leh tui bik chu ching uar a, hlawk zawka hralh suma chantir turin hma kan la mek a. Tuisa link road pawh siam mek niin, Mimbung, Teikhang leh Hrianghmun atanga pan theihin link road zau tak laih zawh a ni tawh a, tihchangtlun zel tum a ni,” a ti.
Ngopa damdawi in (CHC) leh quarters sakthatna tur sum sawrkar atangin a awm tawh tih Lengteng bialtu MLA F Rodingliana hian a sawi a, hna tan mai theih a ni tawh tih a sawi.
Commerce & Industries department chuan tualchhung kutkawih zawrh chhuahna hmun tur mall lian MINECO Aizawlah sa turin hma a la mek a, an tihpuitlin theih chuan Mizoram hmun kilkhawr bera tualchhung kutchhuakte phochhuahna tur tha tak a ni thei dawn tih a sawi bawk.