Kum 97 miin thlawhtheihna thlawk lai thlaa dingin record siam

Britis pitar, kum 97 mi, Betty Bromage chuan tlawhtheihna wing-walking upa ber record a siam. Chupawh a stroke atanga kum khat hnu lekah lehnghal.
Cheltenham khuaa a cheng Pi Betty hi thlawhtheihna wing-walking-ah a mikhual tawh lo a, tun hi kum 86 a tlin hnuah a vawi ruk wing-walk-na a ni a, tun tumah hian kum 97 leh ni 127 a upa niin, wing-walk thei upa ber record a siam.
Record siam tur hian thlawtheihna a thlawh chhuah atanga minute 5 chhung tal thlawhtheihna thlaa a din chhuah a ngai! Thlawhtheihna thlaah hian a dinna tur hmun an siam sak a, chutah chuan dingin, a tlak mai loh a in phuarbehna tur a awm bawk. Chutah chuan thlawhtheihna thlawh chhuah hmain a ding lawk a, a thlawh chhuah hnuah pawh a tum leh thlengin thlawhtheihna thlaah hian a ding ngat ngat mai a ni. An thlawh lai hian thlawhtheihna hia letling zawng tena thlawk nghe nghe a ni.
Recordhi RFC Rendcomb Airfield, Cirencester-ah a siam a, a hmaa hetiang record pawh hi ama siam tho niin, 2022 khan kum 93 mi a nih laiin a lo wing-walk tawh a, hmeichhe zinga wing-walk upa ber a lo ni tawh a, tunah a record siam hi amah bawkin a rawn khum leh ta a ni.
Pi Betty chuan, “Hetiang thil danglam eng emaw deuh hlek tih loh chuan nun a ninawm thei mai dawn a. Motor ka khalh thei tawh lo a, ka khaw hmuh pawh a fiah tha tawh lo, awm mai mai chuan a ninawm riau thin. Chuvangin ka tih theih thil tawh phawt chu tih zel mai ka duh a ni,” a ti.
Pi Betty hi August 2025 khan a stroke ve hlauh mai a, hei vang hian a tawng pawh a la fiah tha thei lo. A stroke atanga kum khat lekah hetianga a che chhuak leh thei ta mai hi a ropui danglam riau bawk a ni. Tun tuma a wing-walk hi Cheltenham General Hospital-a stroke unit tana sumtuak nana a tih a ni nghe nghe.
He damdawi in hi nikuma a stroke a a inenkawlna damdawi in a ni a, “Ka dam loh laiin min enkawl tha hle mai a. Ka tawng a fiah lo deuh e tih mai lohah chuan insawisel zuina em em pawh ka nei lo,” a ti bawk.