Assam-a a fate hmuh laia nu pawngsualtua puh man

Assam-a a fate hmuh laia nu pawngsualtua puh man
January 22-a Cachar, Assam-a an chenna ina luhchilha a fate pahnih hmuh laia nu pawngsualtu leh chemical thil, acid ni ngeia a taksa leihtu nia hriat mipa kum 28 mi, lirthei khalh thin chu police-in Ningani khan an man tih a sawi.
Pawngkhawihtua puh hi pawi a khawihna atanga km 15 dawna hla inah an hmu chhuak a, Dholai Police Station-in a mobile phone an chhui atangin a awmna hi an hre thei tih an sawi.
Nu kum 30 mi, pawngsual tawk pasal hian a nupui leh he mi hi a hma ni, January 21 tlai khan inhmuin a phone number a dil a, a nupui hian pe duh lovin inah a luhsan niin a sawi a. “January 22 khan ina ka haw chu ka nupui hi chhuata lo mu ka hmu a, acid ni awm takin a taksa lo bual huh a. A ka hnawhin a ke leh kut phuar a ni bawk,” tiin a sawi.
Hmeichhe chhungte hian a taksa 70% dawn a kang a, Silchar Medical College & Hospital (SMCH)-ah enkawl mek a ni.
A pasalin a thlen angin police chuan January 23 khan Bharatiya Nyaya Sanhita (BNS) hnuaia Section 64 (pawngsual), 331(4) (mi ina luh luih) leh 123 (tûr lam chi hmanga mi tihnat) tlawhchhanin thubuai an ziak lut.
Hmeichhe pasal hian a nupui leh pawikhawihtu hi tun hma lamin an lo inhmelhriat tawh niin a sawi a. “Pawmlai nei a bitum a, an number pe tur leh hmeichhe chungchang thil mawi lo tak tak sawi thin a ni a. Hun dangah chuan tual chhung miten an khap dai mai thin a; mahse, a sim duh chuang lo a ni,” a ti.
Hetih lai hian pawikhawihtua puh nupui hian a pasal hi dik lo taka tih niin a sawi a, tun hmain pawngsual tawk pasal hian an pa pawisa chu a puk niin a sawi a. “CCTV thlalak a awm vek a, ka pasal hi kha thil thlen zan khan dar 8.30 velah a lo haw a ni,” a ti.
Police chuan finfiahna awm thei angte chu an enchiang dawn a, medical report pawh an nghak tih a sawi a. “Kan chhui zel ang a, kan thil hmuhte pawh kan thehlut thuai ang,” a ti.