Budget session tan, Inrinniah budget pharh dawn
Kum khat lo awm leh tur chhunga ramin sum leh pai a hmanna tur leh a deh chhuah dan tur kaihhnawih hrang hrang pharh leh sawihona tur, union budget session chu Zirtawpni khan parliament-ah tan a ni a, Inrinni hian budget hi Union Finance Minister Nirmala Sitharaman-i’n a pharh ang.
Session tan ni-ah hian tih dan thin angin President Droupadi Murmu chuan rorelna in hniha member kalkhawmte hmaah thu a sawi hmasa a. A hnuah finance minister hian Lok Sabha leh Rajya Sabha-ah Economic Survey 2024-25 a pharh zui.
Economic Survey hi Chief Economic Adviser V Anantha Nageswaran-a kaihhruai team-in an buatsaih niin tangka kum kal mek (2024-25) chhunga India ram sum leh pai leh ei leh bar dinhmun tar lanna a ni.
Hei bakah hian Economic Survey-ah hian kum kal leh tur leh nakin zela ramin chona lian a neih leh thanna tur te, insiam that ngaihna laia kal dan turte pawh kawhhmuhtu a ni bawk.
Tun tum session-ah hian sorkar chuan bill 16 pharh tur a nei a, heng zingah hian Waqf (Amendment) Bill pawh a tel a, Sitharaman-i budget sawiho a ni bawk ang.
Bill pharh tura ruahman zingah hian Banking Laws (Amendment) Bill, The Railways (Amendment) Bill, The Disaster Management (Amendment) Bill, The Oilfields (Regulation & Development) Amendment Bill, The Protection of Interests in Aircraft Objects Bill leh The Immigration & Foreigners Bill te pawh a tel bawk.
Inrinniah hian Sitharaman-i chuan Prime Minister Narendra Modi-a kaihhruai sorkar term thumnaa budget puitling hmasa ber a pharh dawn a ni.
Budget session hi a thawh khat nan February 13 thleng thutkhawm a ni ang a, a tuk atanga chawlin March 10-ah chhunzawm leh a ni ang a, April 4 thleng awhin session pumah thutkhawm vawi 27 awm tura ruahman a ni.
Tih tan thin pangngai angin session tan hma ni, Ningani tlaiah khan all-party meeting koh a ni a. Defence Minister Rajnath Singh-a’n a kaihhruai.
Tun tum session-ah hian eptute chuan Maha Kumbh-a innek buainaa mi 30 thihna thleng te, UGC draft regulations sawi hlawh tak te sawi chhuah an tum bakah NDA-a tel, Janata Dal (United) chuan One Nation, One Election chu sawi chhuah an tum hle.
JD(U) leh Lok Janshakti Party (Ram Vilas) chuan rorel lai, NDA-a tel party tenau zawkten parliament-a thusawina hun tam zawk an neih theihna tur siamsak rawtna pawh thutkhawmah hian an thlen.
Budget session tan, Inrinniah budget pharh dawn
Get real time updates directly on you device, subscribe now.
Next Post