Assam-ah nileng zankhuaa dawr hawn phal dawn

Assam-ah nileng zankhuaa dawr hawn phal dawn
Assam sorkar chuan Ningani khan an khawpui lian zual pathum – Guwahati, Dibrugarh leh Silchar-ah dawr leh sumdawnna hmunte chu nileng zankhua (darkar 24) inhawn theih turin thutlukna an siam tih Chief Minister Himanta Biswa Sarma chuan a puang.
Cabinet an thutkhawm zawha thuthar lakhawmtute a kawmnaah Sarma chuan a council of ministers chuan an khawpui leh khawpui lian dang pahnihah zu zawrhna hmun tih lo dawr leh sumdawnna hmun dangte chu nileng zankhuaa an inhawn theihna tur hi an pawm tih a sawi a ni.
“Hmun dangah chuan dawrte hi zing dar 02:00 thleng an inhawng thei ang a, thingtlangah chuan zan dar 11:00 thleng an inhawng thei bawk ang. Hetih lai hian thawktute chu a rei berah darkar kua bak hna an thawk tur a ni lo va. Darkar 24 inhawng turte chuan thawh (shift) thum an siam tur a ni,” a ti.
Sarma chuan hetianga nileng zankhuaa sumdawngte an inhawng thei tur hian sumdawng tenau tan hun a hawng ang a, thawh hun a pun dawn avangin hna pawh tam tak siam a ni thei dawn tih a sawi.
Chief minister chuan, “Moran hnam, Arunachal Pradesh-a chengten Assam sorkarah an dil a nih chuan cheng nghet nihna, permanent residency certificate an hmu thei danw a. Tun dinhmunah hian Arunachal sorkar hian a pe lo a ni,” a ti bawk.
Tun hnaiah Moran hnam aiawhte hian memorandum thehluhin PRC an neih loh avanga harsatna an tawh tam tak an thlen tih a sawi bawk.
Sarma hian Ningania cabinet thutkhawm chuan thingpui huan awmna hmuna kawngpui sialna tur Rs vaibelchhe 262 an pawm tih a sawi a.
“State sorkar chuan chief minister hlui, Assam-in Congress ni lo chief minister a neih hmasak ber, Golap Borbora-a pian cham kum 100-na an lawm dawn,” a ti bawk.
Cabinet hian National Health Mission (NHM)-a thawkten health department-a hna nghet an dilnaa an dil theih hun kum bi an thliahsak chu an titawp a. Naupang 50 leh a aia tam nei elementary sikula headmaster dah rawtna pawh an pawm bawk tih chief minister hian a sawi.