Assam Chief Minister Himanta Biswa Sarma chuan Congress leader Rahul Gandhi chu ‘chunavi hindu’ (inthlan dawn chauha hindu) tia sawiin Sanatan Dharma ni lo sakhua dang sawina chu ni se opposition bloc INDIA te chet dan a dang ngei ang a ti bawk.
Tun hnaiah Dravida Munnetra Kazhagam leaders Udhayanidhi Stalin leh A. Raja te chuan Sanata Dharma chuan society-ah inthendarhna a siam tia sawiin natna heng dengue, malaria leh coronavirus te ang bawka nuai bo ngai tiin an sawi a ni.
Narsinghpur ditrict-a BJP te huaihawt Jan Ashirwad Yatra neihnaah Sarma chuan Sanatan Dharma chu mi vaibelchhe tel te avangin kum 5000 chuang a awm tawh a ti a.
“Sanatan Dharma hi ni leh thla a awm chhung chuan a awm ang a. Hindus hi dawhthei a ni. Congress leh INDIA bloc te hian anti-Sanatan Dharma te chu freedom of expression angin an chhuah a. Mahse, tu in emaw Muslim chungchang sawi se chuan zankhat thil thuah Congress leh an thawhpuite hian an hnawtchhuak nghal ang,” tiin Sarma chuan a sawi bawk.
BJP chuan Muslim te kalhin tumah tawngkam cheh lo turin an duh a, opposition te pawh hian Sanatan Dharma leh Hindus kalha tawng an remti tur a ni bik lo, tiin Assam chief minister chuan a sawi bawk a. “Sakhua tinte kan zah vek a, sakhua tinte inkawmngeihna awm se” tiin a sawi bawk.
Rahul Gandhi chu nuihsawhin kum 2018 Madhya Pradesh Assembly poll zawh hnuah Congress tena inthlana chakna an chan hnuah temple a tlawh zui lo tia sawiin a chhan chu ‘a thinlungah inpekna tak tak a awm lo’ a ti bawk a, Rahul chu “chunavi Hindu” tiin a sawi zui bawk.
Kum 2018 khan Kamal Nath kaihhruai sorkar Congress ten an din a, mahse, March 2020 khan Jyotiraditya Scindia laka rinawm MLA te tlan tauh avangin sorkar a tlu thung a ni.
Sarma chuan mipui nawlpui tana tha ber a ni chungin Congress tena Uniform Civil Code an dodal chu a hriatthiam loh thu a sawi bawk a.
BJP chu ram aiin a lian zawk em tia zawhna chu BJP leader te chuan chung zawhnate chu ram a lian zawk tiin an chhang zel ang a, Congress te erawh ram nge lian Gandhi family tih zawt ula chuan an dangawk zui mai ang, tiin Sarma chuan a sawi bawk.
Opposition bloc INDIA chu nuihsawh bawkin an hming a inang vang ringawtin mi tu emaw chu Mahatma Gandhi emaw Subhas Chandra Bose an ni ngawt thei lo a ti bawk a.
Madhya Pradesh Congress president Kamal Nath chu ‘hmel zuai’ tia sawiin Sarma chuan chief minister hlui chu Hanuman laka rinawm der tiin a sawi bawk a. Sarma chuan Congress ah amah ngei pawh kum 22 a awm thu sawiin Kamal nath an ‘Hanuman bhakti’ a lantir a la hmuh ngai loh thu a sawi bawk.
Hei bakah hian Sarma chuan MP chu Congress nia Digvijay Singh sorkar lai pawha a tlawh tawh thu sawiin chungah chuan kawngpui tlabal leh khuar te bak a hmu lo tia sawiin tunah erawh state chu hmasawnin BJP rorelna vangin ‘BIMARU’ a ni tawh lo a ti bawk.
Sarma chuan Rahul Gandhi chuan DMK leader te Sanatan Dharma chungchang an sawiah hau turin hun remchang a nei tia sawiin Congress leader chuan tum khat tal chu a nunah Hindu a nihna a lantir tur a ni, a ti bawk.
-- Advertisement --
Assam CM Sarma nupui vangin House rorel buai
Kar kalta khan Assam Assembly rorel chu tum tam tak tihbuaiin a awm a, a chhan ber chu CM Himanta Biswa Sarma nupui chuan ram lei leh hralhah Central subsidy a dawng teuh tia sawi vang a ni.
Zawhna leh Channa neih laiin Congress MLA Kamalakhya Dey Purkayastha chuan Revenue and Disaster Management Minister Jogen Mohan hnenah kaliabor area a ram chu State in ‘basundhara’ scheme a kalpui hnuaiah dah a ni em a ti a. Ram lak a nih nan document theh luh a ni em a ti bawk.
Hei vang hian inhnialna awm zuiin oppostion leh ruling legislator te ch an inau buai zui a, house rorel pawh 30 minutes tihtawp a nih phah bawk.
Lok Sabha-a Congress Deputy Leader Gaurav Gogoi chuan Sarma nupui Riniki Bhuyan Sarma company chuan scheme hnuaiah Centre atangin subsidy Rs 10 crore a la tiin a sawi a.
Assam CM Sarma erawhin a nupui company Pride East Entertainment chuan Centre atangin sum engmah dawn emaw lak a nei lo tiin a sawi ve thung.