Assam Police camp panna kawng sial tihtawp tir duh

State pahnih ramri bul, Mizoram lama Assam Police-in an camp panna kawngpui an sial that mek chu tihtawp tir turin Mizo Zirlai Pawl chuan Mizoram sawrkar thuneitute an ngen.
MZP Gen. Hqrs hruaitute chuan tunhnaia Assam-in hmathar an lakna hmun, Aitlang Vairengte chu Nilaini khan an tlawh a. MZP Hqrs Kolasib, MZP Sub-Hqrs Bilkhawthlir leh MZP Sub-Hqrs Vairengte ten an tawiawm. Joint YMA Vairengte leh Joint VC hruaitute nen thukhawmin, Vairengte khawtlang hruaitute chuan Mizoram Police camp panna kawng, lirthei tlan theihna tura blacktop emaw block emaw phah a nih ve lo tih sawiin, awlsam taka tlawhpawh zung zung theih a la ni lo chu chak zawka sawrkar nawr turin an lo ngen.
MZP hruaitute chuan Assam Police-in an camp panna kawng, lirthei luh theihnana Pu Samuela huan bul an laih leh Pu Chhandama huana Assam Police-in camp an nei nia lang chu a hmunah an enfiah a. Mizoram lam camp, 3rd Bn MAP awm mekna piahlama kawng an laih chu ruah a sur avangin chawlhsan rih mah se, kumin August 9-a Assam leh Mizoram sawrkar inbiak leh hma chu hnathawh hi an tihtawp theih nan hma la turin thuneitute an ngen tih an sawi a ni.