Assembly Session a lar

February ni 17-a tan Budget Session chu March ni 16 khan an zo ta a, titi a siam leh hle.
Tun tumah hian house leader bill put luh a tlang lo a, Mizoram Assembly-ah house leader bill put luh a tlang loh vawi khatna a nih an rin thu MLA hluite’n an sawi.
Sorkar bill put luh chu a changtu department-in an thial bakah finance department leh law department a paltlang a, chu chu council of ministers/cabinet thutkhawmah an ngaihtuah leh thin. Chutiang a paltlang hnuah February ni 23 khan house leader-in Sialkal Range Development Council Bill, 2026 a pu lut a, mahse a tlang lo!
Member-te’n he bill chungchanga sel an neihte chu house leader-in a hnial miah lo a, an selna atangin an hmuhchhuah chawp ve thu sawiin, “Chik takin kan lo en lo a,” a ti.
Chu bill chu select committee-in chik taka a en turin an dah ta a, mahse select committee an din dan a dik lo, House-a an tih ngai loh danin an din.
Tun term-ah an session hmasa ber atangin social media-ah video clip engemaw zat a lar tawh a, tun tumah pawh clip lar a tam leh.
Rules of Procedure and Conduct of Business in Mizoram Legislative Assembly tih bu a awm a, chumi bu-ah chuan house chhunga member-te awm dan tur Code of Conduct for Members Inside the House tih a awm. Chutah chuan chipchiar takin dan an ziak a, thusawi zawha chhuah nghal phal loh a nih thu thlengin an ziak. Ngaih pawimawh a hlawh lo niin a lang a, mobile phone emaw pager emaw ken luh phal a nih loh thu te, tawngkam mawi lo hman phal a ni loh thu, intih hmingchhiatna tawngkam leh unparliamentary word hman phal loh a nih thute chipchiar taka ziah a ni.
Speaker chair-a thuin a phalsak a nih loh chuan thusawi tur ziah sa (written speech) chhiar phal a ni lo a, mi tawngkam an sawi chhawng (quote) dawn a nih pawhin “Pu Speaker, i phalnain,” an ti phawt thin. Chu chuan ngaih pawimawh a hlawh lo a, minister-te zingah pawh an demand sawiho ni-a a hmawrbawkna (wind up) thu an sawiin ‘written speech’ chhiar char char an awm thin.
“Member-te’n a demand an sawite kha a tawpah minister-in a ‘wind up’ thin a, member-te thil sawi kha a ‘react’ tur a ni. Sawi tur an lo ziak sa a nih chuan member-te thil sawi kha ‘react’ an tum lo tihna a ni ang, member-te sawi tur a hriat sa theih loh,” ukil pakhat chuan a ti.
Assembly Session-ah hian thu khel tur leh ngaihtuah tur bik a awm a, a indawt dan tur thlengin an duang sa thin. Mahse member zingah mahni vei zawng sawina hun atana hmang hmiah hmiah an awm thin. Minister pakhat pawhin a demand an sawiho tumin a wind up-naah a vei zawng a sawi hrep.
Session hmasa atang tawhin house-ah hian mahni vei zawng aupui chiam an awm thin a, mahse chutiang ti an awm chang chuan mipui lamah a sawi tha tia lo lawm an awm thin thung! Mithiamte pawhin an lo fak thin tlat bawk!
Speaker an ‘address’ tur a nih laiin hei hian ngaih pawimawh a hlawh lo a, member leh member an inchhang miah miah thin a ni ber. Lei dawh tumna a awm em tih zawhna, minister-in a chhannaah pawh speaker a address miah lo a, a zawttu a chhang hmiah hmiah. Hei hi tun tum Session-a video clip lar pakhat a ni.
Tun tum Session-in hriat zui a hlawhna tur pakhat chu house chhunga awm dan tur chungchanga speaker-in member-te a khak kha a ni awm e. Speaker hi address tur a ni tih hi house-a thu lote pawhin an hre turah ngaih a nih laiin speaker hian “Speaker address lova direct-a member dang han in-address maite leh thil dang mawi lo tak tak hi a thleng ta fo mai a,” a ti. Zawm a hlawh zui vak awm pawhin a lang lo a, lei dawh tumna a awm em tih zawhna, speaker address lova an inchhang pawh kha speaker-in he thu a sawi hnua mi a ni.
Speaker hian March ni 9-ah house zahawmna vawng tura ngenna chungchang hi a sawi a, handbook for Members chhiar nawn turin member-te a ngen! House chhunga member-te’n social media-a mipui game play ni awm taka an chetna chungchang te pawh a sawi a, intih lar leh mipui hmin tumna vangin house dan an bawhpelh thin niin sawi a ni ta fo mai, a ti.