ASTEROID 2023 BU

By Familia Fanai Lal\ansanga

Vansanga thlawk lungtum lian lawk, feet 11.5 x feet 28 vela lian chuan kan chenna khawvel atanga km 3,600 (mel 2,200) vela sang atangin Zirtawpni (27.01.2023) zing dar 6:30 vel khan South America khawmualpui mawng lamah khawvel a rawn thlawh khum fua a, vansanga thil hlatzawng tehkhawng, êng kum (Light year) nen khaikhin ralah chuan he asteroid 23 BU-in khawvel a sut lohna hi bele bawk lek a ni, kan ti thei awm e.
World Cup inkhel lai live-a TV kan en theihna tura vansanga telecommunications satellite te khi vansang km 36,000 (mel 22,000) vela sanga an dah a ni a, tuna asteroid 2023 BU hian chûng satellite aia hnaiah khawvel hi a rawn thlawh khum zuai a ni.
Asteroid chu Ni leh a heltu planet te (Solar system) inkara lungtum ang thlawk noh noh ho hi an ni a, te tak tê tê an awm laiin lian pui pui, tlang tiat laia lian leh hrawlte pawh an tam mai.
Vansanga thlawk thil sakhat, buhhum tiat vel atanga thlangra tiat vela lian hi ‘meteoroid’ an ti a. Chutiang aia te chu vansang vaivut (space dust@ micrometeoroid) an ti a. Chutiangin he kan chenna khawvel a rawn hnaih a, vansanga boruak (atmosphere) a sut hian a alh ta zuai zuai a. Chu chu arsi thlawk (shooting star) kan tih hi a lo ni ta a. Vansanga alh ral ta te chu ‘meteor’ an ti a. Alh ral lova khawvela a them rawn tla thla te chu ‘meteorite’ an ti ta thung a ni.
Dinosaur te kha khawvelah hian an lo awm tawh ngei tih chu tlang hriat a ni a. Eng tin nge, eng vangin nge an chimih tak thut tih erawh tu mahin an la hre lo.
Luis leh Walter Alvarez te pafa ngaih dan, ‘The Alvarez hypothesis’ hi Dinosaur thih mang nachhan ni thei awm bera ngaih a ni a. An ngaih dan chu kum 1980 khan a puang a: – Kum maktaduai 66 kal ta khan tlang tiat zeta hrawl meteorite chuan kan chenna khawvel hi a rawn su bur mai a. A sut nat em avangin khawvelah boruak chhia chi hrang hrang te, vaivut khu te leh lung them tam takte chuan khawvel boruak hi a lo tuam ta vek a. Chu chuan dinosaur te kha a tichimit vek a ni, an ti.
A thusawi finfiahna atana an thil rawn tar lan chu dinosaur fossil-a tam tak an hmuh chhuah metal iridium a ni. He thir chi khat hi khawvelah a vang em em a, vansanga thlawk meteorite-ah te chuan a tam em em thung a. Chuvangin dinosaur te mangna chhan bulpui ber chu vansanga meteorite ten khawvel an rawn sut vang a ni, an ti.
An sawi ang leh an rin dan ang deuhvin Mexico Yucatán Peninsula tuifiatriat kamah khuar thuk em em leh zau em em an hmu a. An khuar hmuh, Chicxulub crater hi mel 93 laia zau a ni. Dinosaur mang kum leh he an khuarkhurum hmuh te nen han chhui dawnin The Alvarez hypothesis hi thil ni ve thei tak chu a ni awm e.
Art lam – thu leh hlaah chuan miin a ngaihruatna te, a lunglenna te, a suangtuahna te ngaihnawm takin a phuah thei e, Science-ah erawh chuan a finfiahna (evidence) a ngai thung.