Aston Villa forward thar Rogers

Kumin January thla FA Cup-a Aston Villa laka sikhat faia an tlawm tuma Middlesbrough thuam inbel Morgan Rogers chuan Villa a zawm fel a; a man zat hi sum hma-hruaiah pound maktaduai 8 leh a khelh dana zira pound maktaduai 15 thlenga pung chho leh turin an inrem.
Kum 21 mi Rogers hian season kal laiah Championship club Boro tan game 33 atangin goal sarih a thun tling tawh a, assist vawikua a nei tling.
England Under-20s international hian nikum July thla khan kum li chhung atan Riverside Stadium a pan a, a man-ah Manchester City khan pound mtd 1.5 an rut.
Aston Villa hian tun thlasik insuan hun chhung khan Australia keeper Joe Gauci pawh Adelaide United atangin an senglut a, an leina man puanzar a ni lo thung.
Kum 23 mi Gauci hian Qatar ramah Asian Cup a khel mek a, tournament zawhah Midlands club hi a pan thei chauh dawn a, England thleng turin inter-national clearance leh visa tihfel a la hmabak.
Hetih lai hian Villa forward Bertrand Traore pawhin La Liga club Villa-rreal chu free transfer-in a zawm ve bawk.
Villa hian kum 28 mi Traore hi September 2020 khan £17m-in senglut mah se Premier League a thlen hnua a khelh that tawk loh vang leh a fitness tha lo thin avangin Emery chuan a chhuah theih thu a hrilh a, a contract an tihtawp hnuah man nei loin a duh lam hawi theihna pek a ni zui ta a ni.