Aston Villa in hma lam an pan

Inrinni zana English Premier League (EPL) khelhah Aston Villa chuan hnehna an chang a, champions league khelh phak beiseina nen hma lam an pan. Villa an chak lai hian Arsenal erwh chu an mualah AFC Bournemouth hneh lovin an tlawm ve thung.
Aston Villa hian Villa Park-ah Fulham an mikhual a, an mualah bul an tan tha hle. Inkhel tan atanga minute 12-na lekah Youri Tielemans chuan hmahruaina goal a thun. Hma takah goal an thun vangin an phur a, an inringtawk zui viau bawk. Hma taka goal a luh hnuin team hnihte an inhnehtawk zui viau a, goal thun tumin an innawr tawn nasa hle. Goal thun tumin tan khawh dun viau mah se hun tawp thlengin goal lut a awm belh thei tawh lova, Villa chuan an mualah hnehna changin point thum hlu tak an hmu.
Fulham laka point thum an hmuh hmangin Aston Villa hi sarihnaah an inhlangkai a, champions league khelh phak an hnaih leh zual. Villa hian vawi 35 khelin point 60 an hmu a, pasarihnaah an awm mek. Palinaa awm mek Newcastle United nen point hnih chauhin an inthlau a, pangana leh paruknaa awm mek Chelsea leh Nottingham Forrest te nen an inhmuh zat a inang mek bawk. Khelh hmabak pathum an la neiha an result leh an elpui liante result a zirin Villa hian champions league khel phak theihna hun remchang an la nei.
An muala Aston Villa an chak lai hian pahnihna Arsenal chu an mualah ngei AFC Bournemouth hneh lovin an tlawm ve thung. PSG hmachhawn leh tura inbuatsaih Gunners in result tha an nei thei lo.
Arsenal hian an mualah bul an tan tha thawkhat a, goal thun hmasa zawkah an tang. Gunners tan hian midfielder chetha tak Declan Rice chuan minute 34-naah hmahruaina goal a thun a, Rice goal thun hmangin si khat faia hmahruai chungin chawlhlawk an hmang.
Chawlhlawk hnu lamah Bournemouth an khel tha ve thung a, goal hnih thunin mual neitu an lehthal. Bournemouth tan hian defender chetha tak Dean Huijsen chuan minute 67-naah goal thunin an si phurh a sut. Club lian zawkte ngaihven hlawh mek Huijsen-a’n goal a thun hian amah ngaihventu club lian zawkte chil a tiput nasa leh zual hle ngei dawn. An si phurh an sut hnuin Bournemouth an khel tha zui viau a, goal khat an thun belh leh. Hun chawhnu lamah minute 75-naah Evanilson chuan hma an hruai letna goal a thun. Evanilson goal thun hi Arsenal in hun tawp thlengin an sut zo thei tawh lova, an mualah ngei an tlawm zui ta a ni.
Nilai zan maia Paris St-Germain hmachhawn zui leh tur ni bawk mah se Arsenal hi AFC Bournemouth lakah an inthlah mai lova, an that dan berin an inlan. An that dan berin inlan bawk mah se hnehna an chang zo ta chuang lova, pahnihna an la ni chiang thei bik lo tluang zel. Inrinni zana chak lo Arsenal hi nilai zan khian PSG hneh ngei mamawh chungin Parc de Princes ah an lenglut dawn a, inelna lianah fiahna hautak zawk an hmachhawn a ngai dawn.
Inrinni zana inkhel dangah Everton leh an mikhual Ipswich Town nen 2-2 in an inhnehtawk. Everton hian Championship lama tlahniam chiang tawh Ipswich Town lakah Beto leh Dwight McNeil te goal thun hmangin hma hruai bawk mah se, Ipswich tan hian a Julio Enciso leh George Hirst ten goal an thun zui ve leh a, EPL khel zui tur Everton lakah tlawm an pumpelh.
Inrinni zan vek hian tlahniam chiang tawh pahnih; Leicester City leh Southampton te chu King Power Stadium-ah an inkhel a. Leicester City hian Jamie Vardy leh ‘Jordan Ayew te goal thun hmangin an mikhual Saints hi 2-0 in an lo hneh.