Turkey ram in chima nunna chan Ghana footballer Christian Atsu Twasam ruang chu Pathianni tlai khan Ghana khawpui Accra-a Kotoka International Airport thlenpui niin, he khawpuiah hian vuiliam a ni.
February ni 6 lir-nghingah khan Hatay khawpuia a chenna in chimah a bo pil vang vang a, Inrinni khan a ruang hi hmuhchhuah chauh niin, kum 31 mi Ghana winger chuan ruang mai niin an khua a lut.
Atsu kuang hi Ghana hnam puanzara tuam niin, Kotoko International Airport-ah hian an ram vice president Maha-mudu Bawumia chuan a lo dawngsawng a, sipai rual khatin zahna chibai an buk bawk.
Bawumia chuan thlawhna tumhmuna Atsu lo hmuaktu a chhungte leh mipui hmaah thu sawiin, “Beiseibo kan beisei a; ni a liam zel a, tawngtai leh mai thin loh chu tih theih dang kan nei lo. A tawpah hmuh a ni a, a nunna a lo thlah hman ta si…” a ti.
Tarlan tawh thin angin, English Premier League club pathum Everton, Chelsea leh Newcastle United thuam inbel tawh thin Ghanaian hian nikum September thla khan Turkish top flight (Super Lig match) club Hatayspor zawmin, lirnghin hma ni chiah February ni 5 khan Super Lig match-ah a club chakna goal a khung a; an manager sawi danin, lirnghin hma darkar tlemte la awmah khan lirnghing tuar nasatna hmun Turkey ram chhim lam thlawhchhuahsan tur a nih laiin a zin tum a thulh a, vanduai mangkhawngin a nangching zui ta a ni.
Ghana tana game 65 khel tling Atsu hian 2015 Africa Cup of Nations final thlenpuiin, penalty petah Ivory Coast an ngam lo a; kum 2019 hnu lamah ram tana koh a hlawh ta lo.
Atsu ruangin an khua a thleng
Get real time updates directly on you device, subscribe now.
Next Post