United lei tumtute zingah Qatari PM hlui fapa tel

Manchester United neitu Ame-rican mihausa chhungkua Glazer family-te chhangkhamna a lian rei tawh a, Old Trafford stadium-ah ngei an supporter-te’n kalbo tura an duh thu ziak leh tawngka pawhin an lantir tawh thin a, a tawpa tawpah club-a chanpual ngah ber Glazer chhungkua an tang zo ta lo a, nikum tawp lam khan pound vaibelchhe sarihin an chanpual hralh an remtih thu an puang ta nge nge a, lei tuma dawrtu (bidder) zingah Qatari mihau tawntaw an tel.
Manchester United hian khawvel hmun hrang hrang atangin dawrna a dawng nual a, karliamta Zirtawpni khan Qatar prime minister hlui fapa Sheikh Jassim Bin Hamad Al Thani pawhin Premier League club lei tumin dawrna (bid) a thehlut.
|um 20 zet English champion ni tawh Old Trafford club hian khawvel pumpuiah fans maktaduai 650 chuang neiin market research firm Kantar chuan a chhut a; a lan danah chuan khawvel club ropui thenkhat neitu Arab mihausate’n Red Devils pawh an thunun leh thei dawn a ni.
Tuna lei diltu zinga langsar ber rawn ni chho nghal hluai Sheikh Jassim hi Gulf state (Qatar)-a pa hausa ber Sheikh Hamad bin Jassim bin Jaber Al Thani fapa a ni a, Jassim-a hi Qatar rama bank lian berte zinga mi QIB chairman a ni.
French champions Paris Saint-Germain neitu Qatari state investor rualte pawhin Manchester United pumhmawm zui leh tum hian an chipui Sheikh Jassim hi an hmachhawn dawn tih thawm hriat tur a awm a, PSG neitu Sheikh Hamad lam atangin thu leh hla hriat tur erawh a la awm lo.
United fan kumhlun leh chemicals firm INEOS founder ni bawk British billionaire Jim Ratcliffe pawh bidder langsar rawn ni chho tura beisei a ni a; Reuters tarlan danin US private equity firm-te pawh an chechhuak dawn.
Ratcliffe hian vantlang hriatah Old Trafford club lei a duh thu hi a lo sawichhuak fo tawh a ni.
Karliamta Ningani khan Daily Telegraph chuan Saudi Arabia lam mite pawhin Unted lei turin dawrna (bid) an thehlut tawh niin a tarlang.
United hralhna hian sports sumdawnna huangah record thar a siam ngei rin a ni.
Reuters tarlan tawh angin, tun dinhmuna infiamna huanga indawrna hraw ber ni mek chu London khaw Premier League club Chelsea leinan’na a leiba neih leh investment kal lai zawng zawng rulhsak chunga US dollar vaibelchhe 5.2 thehchhuah kha a ni.
United hi tun dinhmunah khawvela football club hausa palina a nih thu Deloitte zirchianna chuan a tarlang a, khawvel infiamna tawh phawt zinga hlu ber pawl zinga chhiar tel a ni.
Glazers hian kum 2005 khan United hi pound maktaduai 790-in an lei a, season tharah chuan midang kutah a awm ve tawh dawn niin a lang.