Aussie hmeichhe vanduai chhuah zalen

Australian hmeichhia a fa sen pali tihluma puha kum 20 lung in tantir tawh chuan chhuah zalen a nih hnuah ‘thudik leh science tana hnehna’ tiin a sawi.
Kathleen Folbigg hi lung in atangin a chungthuah finfiahna thar awma thiam chantir a nih zui hnuah chhuah zalen a ni a.
Kum 20 kalta khan a fate uphluma puhin thiam loh chantir a ni a, tunah erawh tunlai thiamna hmangin a fate khan genetic lamah harsatna nasa tak an lo neih vanga nunna chan tih finfiah a ni ta a ni.
Kum 55-a upa ni tawhin a zalen ta chu a lawmthu a sawi a. “Kum 20 chhung lung in ka tang a, ka fate kha ka hre reng ang a, ka sun reng ang,” tiin a sawi.
Folbigg chuan a thiante leh amah thlawptute chu lawmthu hrilh bawkin a case review a nih theih nana an beihnaah lawmthu a hrilh a. “Anni tel lo se tun hun hi ka thleng lovang,” tiin a sawi.
Folbigg hi a thian Tracy Chapman chuan Lung In kawngka bulah lo nghakin a zalen hnuah khum nuamah hun hmangin, pizza leh garlic bread bakah Kahlua leh coke a ei in a ti a. Chapman chuan Folbigg chan tunlai thiamna smartphone te a hmu chu mak a tih thu a sawi tiin a sawi bawk.
“Kathleen thinlungah huatna a awm lo. Kum 20 a hloh tawh a, hma lam pana nun a duh mai a ni,” tiin a sawi.
New South Wales Attorney General Michael Daley chuan Folbigg chu tun hnaiah a case chhui chian a nih hnuah thiam changa chhuahtir nghal a nih thu a sawi zui bawk a.
A chungchang chhui chianna retired judge Tom Bathurst an a neihah a fate pali chu natural cause avanga thi vek an ni a ti a ni.
Immunologists te chuan Folbigg fate chuan genetic mutation CALM2 G114R an nei veka chu chuan lungphu chawlin a awmtir tiin an sawi.