Autistic naupangte pualin hmang

Autistic naupangte pualin hmang
Mipui vantlangin ‘Autism’ an pawm thiam a, hetiang vohbikten tanpui an mamawh zia an hriat tharna tura inhrilhhriatna thla – ‘Autism Acceptance Month’ atan April thla hi hman a ni a. Hemi pual hian April 28 khan Autistic Community Mizoram huaihawtin Gilead Special School-ah hun hman a ni.
Autistic nu leh pa atangin leh Gilead Special School-a Autism enkawltu miss H Lalbiakdiki leh zirtirtuten thu an sawi a. Gilead Special School-a kal Autism naupangten special item an nei. Autistic nu leh paten an harsatna tawh sawiin, mipuiin hetiang naupang harsatna bik neite kan la hmelhriat tawk lo tih an sawi a. Autism naupang an pung zel a, tanpui an mamawh a, mipuiin kan hriatthiam a, kan pawm thiam a tul tih sawi a ni.
Autistic Community Mizoram hi kum 2025 khan din a ni a, naupang harsatna bik nei Autism nu leh pa Mizoram hmun hrang hranga awm inzawmkhawmin an din a ni a, tunah hian member 216 vel an awm mek.
Autism hi thluak leh rilru lama danglamna a ni a, naupan lai atanga awm thei niin, tawng, mi biakpawh leh khawsak honaah harsatna an nei a. Thenkhat chu an nunphung chik taka enchian loh chuan an harsatna a hriat mai theih loh a nih laiin, nun dan phung pangngai lo tak lantir a, mi zinga awm hleithei lo khawpa ze danglam nei an awm bawk.
Hetiang harsatna hi a tih damna damdawi a awm loa, enkawlna leh kaihhruaina an dawn dan azirin khawsak phung dik leh hmasawnna kawng dik zawh tura kaihhruai theih an ni.
He harsatna awm chhan tak hi mithiamten an la hmuchhuak loa, thil engemaw – natna hrik emaw, accident emaw, inthlahchhawn thil emaw, chhehvela thil thleng vanga, hriatna thazam leh thluak hnathawh tibuai thei thil a lo thlen vanga awm nia sawi a ni.