Awmze nei siin zu khap bur loh a tul – PC party

Zu khap bur chuan thalaite ah nghawng tha lo zawk a nei nia an hmuh thu PC party chuan sawiin, awmze neia khap bur loa zu siam chu ram leh hnam hmakhua thlirin a tul tih an sawi.
PC senior vice president Lalrinzuala Chawngthu chuan thuchah siamin, Excise department-in tunlai rakzu in reilote chhunga mihring hriselna a khawihchhiat nasat theih zia leh nunna a pawhtawi theih zia an tarlan chuan, zu in duh leh zu in lo thei lote tan zu tha leh pangngai tak, inkhuahkhirhna dan hnuaia awmze nei leh fel taka kalpui a tul zia a tichiang hle tih a sawi.
Zu tha lo nghawng ni ngeia ngaih theih tura Mizo thalaite nunna chân tam zia sawiin, “Kumina Central KTP rorel inkhawm tarlan danin, kum 2022 chhungin KTP member 643 an thi a, hei hi Mizorama KTP member boral tam ber kum a nih thu report-ah a lang. Hei bakah hian vengtin khawtina zu tha lo in avanga thalai leh pavalai tak tak boral engemawzat an awm,” a ti.
Tawngpawng zu khap bur ringawt chu ramin a thatpui aiin a chhiatpui hle zawkah an party chuan a ngai tih PC hruaitu hian sawiin, “Zu zawrh leh zu in hi tha kan tih loh rualin, khawvel awm chhungin Zoramah ngeiah pawh zu in duh leh zu in lo thei lo dinhmuna dingte kan bang dawn chuang lo niin a lang a, zu khap burna kalpui inti chung sia zu tha lo in tur awm reng leh khap theih chuan si loh buaipuia kan thih zawih zawih reng ai chuan, inkhuahkhirhna awmze nei tak hmanga zu siam hi ram leh hnam hmakhua atan leh kan economy hmasawnna atan a tul kan ti hle,” a ti