Azerbaijan-ah Piastri dingchang ve hlawl

Double world champion leh driver standing-a hmahruaitu ni mek Max Verstappen chuan chak ni hmel a hmu thei ta lo tluang zel a, Pathianni Azerbaijan Grand Prix-ah pawh Red Bull driver chhuanvawr hi pangana a ni pha leh chauh a, a team-mate Sergio Perez leh Ferrari driver Carlos Sainz chetsual hlawkpuiin McLaren car khalhtu Oscar Piastri chuan pakhatna dinhmun a rawn luah hlawl a, he hnehna avang hian constructors’ championship lamah McLaren chuan Red Bull an lehpel zui ta bawk.
2024 F1 Azerbaijan Grand Prix-ah khan pole position atanga tlanchhuak Charles Leclerc chuan intlansiak a thunun nghet viau edawn emaw tih laiin Lap 20 Turn 1-ah Piastri a rawn dawk zawk a, Ferrari driver lehpelin hma a hruai zui ta mai a ni.
An pahnih hian an inthlur zui ta ngat ngat a; Piastri defensive pui tak chuan a hnungah Baku tlankawng hmang thiam, a zawna pole vawili luah thei Monegasque Leclerc a dah tluan thei a, Caspian sea tuipui kam tlankawng ngainatawm zetah a vawikhatna’n Australian hian hnehna a chang a, a hnung chiahah Leclerc thlengin, lawmman semna dawhsan hniam ber luahtu chu Mercedes Briton driver George Russell a ni.
Kartawp intlansiak hma lawk khan McLaren chuan vantlang hriatah title race-a Verstappen hnungdawltu Lando Norris chu a champion theihna tur kawnga puih a ngaihna zawnah chuan team order hmangin emaw kawng dang emaw hmangin an driver pakhat zawk Piastri aia an duhsak zawk tur thu an puangzar a, mahse, qualifying-ah Norris a chefuh zo lo a, 15-na daih atanga a tlanchhuah avangin McLaren tan team order hman pawh a ngai ta lo a, podium chuangkai pha lo tawk chiahin palinaah a thleng.
Lap tawp lamah Leclerc hnungdawl tura pathumna inchuhin Sainz leh Perez an innawr a, Turn 3-ah Perez chuan Sainz-a Ferrari car va tawk fuhin, an pahnih hian tlankawng hungna bangah insawhin an chesual dun a, Virtual Safety Car hmuh tur a awm phah.
Driver pahnih tlan chhunzawm thei ta lo hi Mercedes driver George Russell chuan hlawkpuiin lawmman semna dawhsan a luah theih phah lel a; lap thum tlan tur la awma Verstappen hmakhalha palina luahtu Lando Norris chuan title race-ah hmahruaitu Dutchman nena an inkar a pawtzim a, Red Bull driver nen hian point 59 chauhin an inthlau ta.
Pangana bak luah pha lo Verstappen hnungah hian Aston Martin mi chhawr Fernando Alonso, Alex Albon leh Williams tana double points hmutu Franco Colapinto an thleng.
Pitlane atanga bul tan seven-time world champion Lewis Hamilton leh Briton ve bawk Oliver Bearman-te chuan point hmuh phakna hmun hnuhnung pakuana leh sawmna an luah.
Tarlan tawh angin, constructors’ championship lamah McLaren chuan point 20-in Red Bull an lehpel ta bawk.