Badminton zirna hawng

Badminton zirna hawng
May ni 8, 2025, Ningani khan Mizoram Badminton Centre, Zuangtuia TATA Trusts, NEIDA, Pullela Gopichand Badminton Academy (PGBA), Mizoram State Sports Council (MSSC) leh Mizoram Badminton Association (MBA)-te thawhhona atanga din Regional Competitive Training Centre (RCTC) leh MBC Grassroot Centre chu sports minister Lalnghinglova Hmarin a hawng.
MSSC secretary Henry C. Lalrawnkima chuan khual zahawm niin he hun hi a hmanpui bawk.
He’ng centre pahnih hawnna programme hi MBA treasurer Laltanpuia’n a kaihruai a; MBA Project Monitoring Committee secretary Prof. Lalhriatzuala’n report a pe thung.
MBA president Dr. Lallianzuala Hnamte hnen atangin inlawmna thuchah ngaihthlak a ni a; MSSC leh sports minister-te nena MBA-in thawhhona tha tak an neih theih avangin lawmthu a sawi.
Sports minister chuan thu sawiin, badminton-ah India a san avangin India rama lang phak nih chu khawvela lang phak nihna a nih thu leh kum 2036-a India-in Olympics thlen a tumah pawh Mizoram infiammite an tel ve ngei theihna’na hma lak tan a nih thu sawi chungin, Mizoram atanga badminton player-te that dan enin Olympic-a an lan theih a hnai riau nia an hriat thu a sawi a, sorkarin Empowering Mizoram Sports tih hnuaia sports discipline a thlan bikah badminton a tel thu a sawi.
Khual zahawm pawhin thu sawiin, sorkar kaltlanga badminton centre tha tak din a ni chu lawmawm a tih thu sawi chungin trainer-te a fuih a, thuawihna leh inthununna tha tak hnuaiah nakin lawka Mizoram leh India ram tihmingthatu an la nih theih thu a hrilh.
Report atanga a lan danin, tun dinhmunah TATA Trusts, NEIDA, PGBA, MSSC leh MBA-te thawhhona hnuaiah Mizoram hmun hrang hrangah Grassroot Centre 24 a awm mek a, chu’ngah chuan naupang 1047 an inziaklut.
Kolasib leh Champhaiah Elite Centre din niin, he’ngah hian badminton training lai mi 27 an awm a; RCTC, Zuangtuiah mi 20 awm mekin, PGBA-ah mi pakua TATA Trusts lamin an sponsor mek bawk.
He programme hnu kharna’n hian MBA vice president Lalchhuanawma chuan lawmthu sawi chungin
Mizoram Badminton Association-in an programme hmanpuitu zawng zawngte chungah lawmthu a sawi tih a tarlang tel.