Bairabi ‘N’ YMA vangin FCI-in buaina a tawk

Bairabi ‘N’ YMA vangin
FCI-in buaina a tawk
Mizoram buhfai tur rel hmanga Bairabia phurh thlen thin chu Pathianni bikah Bairabi North YMA-in unload an phal loh avangin harsatna hrang hrang an tawh thin thu Food Corporation of India chuan an sawi.
FCI divisional manager Zodinpuii Ralte chuan Mizoram buhfai tur Inrinni zan emaw Pathianni chawhma lama a rawn thlen changin Bairabi North YMA-in Pathiannia hnathawh an phal loh avangin an unload thei lo thin a. Unload theih a nih loh avang leh relin a nghah a ngaih thin avangin cheng nuai 13 chuangte chawi belh a ngai thin tih a sawi.
Railway ministry-ah harsatna an tawh hi an thlen tawh thin thu sawiin, Pathiannia hnathawh phal loh, tih chu an hriatthiam loh thin thu a sawi a. Central YMA leh Kolasib district bawrhsap hoa an sawiho pawhin awmzia a awm thei tak tak chuang lo niin Zodinpuii Ralte hian a sawi. Hei vang hian buhfai tangkhang a awm phah nual thin thu a sawi bawk.
Mizoramin buhfai kan hnianghnar tih FCI hotu hian a sawi a. FCI kudam hrang hrangah thla thum chhung daih buhfai a awm a; stock quintal 214610 a awm tih a sawi a. Bairabi kudam bikah buhfai awm thei zat tura ruahman aia tam a awm tih sawiin, buhfai phurtu tur lirthei an duhkhawp an hmu lo thin tih a sawi a ni.
India sawrkar chuan FCI kaltlangin Open Market Sales Scheme (OMSS) hnuaiah FSSAI licence nei chinte tan kartin buhfai leh wheat an lilam thin tih a sawi a. MJUNCTION portal atangin Zirtawpni apiangin tender an chhuah thin thu leh kartin Nilaini apianga tlan theih a nih thu a sawi a. Reserved price kg khat Rs.31 ni thin chu, Rs.29-ah a tlakhniam tawh thu Zodinpuii Ralte hian sawiin, mipui chu OMSS hi hmang tangkai turin a chah a ni.