Hmeichhe tan- tih sual loh tur
Mipa leh hmeichhia chu rilru leh taksa pawh inang lo kan ni a, chuvang chuan inlaichinnaa rem taka inkawp fuh chaih hi chu har ve thawkhat tak tur a ni ve reng reng. Tute pawhin an nupa nunah a ni emaw, inngaihzawnnaah a ni emaw boruak tawn san lai leh hniam deuh lai an nei deuh theuh. Heng harsatna kan tawh thinah hian hmeichhia ten tihsual kan nei a ni thei ang em? I mipa duh zawng tak i kawp a ni emaw, i hmangaih tak pasalah i nei a ni emaw, hmeichhia ten tihsual kan nei fo thin. Tun tumah hian Park Hospital, Gurgaon-a Psychologist leh Hypnotherapist Dr. Rashi Ahuja thurawn, hmeichhia ten an tih loh tur nia a sawi te kan rawn tarlang e.
1. Dawhthei zawkah tan reng bik loh tur. Inlaichinnaah a dawhthei zawk awm a tul thin a, chu chu inlaichinna tinghettu pawh a ni thin. Mahse, a dawmtu leh dawhtu zawka tan reng a ngai a nih chuan dik lo a awm tihna a ni. Entir nan, i kawppui chuan kut thlak che a ching a ni thei a, tawngkam chhe tak taka ân khum che a ching pawh a ni thei a, i rilru nat ngawih ngawihna tur a siam fo che pawh a ni thei. Chutiang chu in boruak a nih chuan eng emaw chu tih a ngai a ni. Chutiang ringawt chu a dik lo a, i dawh reng thei bik lo tih i hriattir a ngai a, chuti chung pawha a thleng nawn fo a nih chuan in pahnih inkar chu chhutchah mai a tha zawk ang. Nupaah kan insiam chhan te, kan inkawp chhan te chu kan taksa leh rilru hriselna intihchhiat sakna tur a ni lo va, hrehawm tuar reng tura innei leh inkawp pawh kan ni lo.
2. I kawppui chauh chu dah hmasa ber reng suh. Hmeichhia ten an ngaihzawng emaw an pasal emaw te chu i nunah a pawimawh a, chutiang chiahin nangmah pawh i inngaipawimawh ve tur a ni. I pasala thiante i lo hmelhriat a i kawmnel chu a tha, mahse, nangma pual thian te pawh i nei ve tur a ni tih theihnghilh suh. Hmeichhe tam takin ngaihzawng/pasal an neih hnuah an thiante an thlah daih thin. An kawppui te chu an ngaipawimawh ber a, chutah chuan an insawr bing a, mahse, mipa tan erawh chutiang a ni ve kher si lo. Mipa chuan a ngaipawimawh che a, chutih rualin amah pawh a indah hmasa thiam tho.
` Dr. Ahuja chuan, “A chang chuan kan seilenna leh kan chhehvel boruak a zir pawh a ni thin. Nu leh pa tam takin an fanu te chu insiam rem turin an fuihin an zirtir a, mahse, eng chena chutianga awm tur nge tih kan hrethiam leh si lo. Nu leh pa ten hei hi kan fate kan sawipui thin a tul a ni,” a ti.
3. A tihsual apiang ngaidam reng bik suh. Vawi hnih khat tihsualah thupha an chawi a, an tihsual an pawm chuan inngaihdam a tha, mahse, chutiang chu a thleng fo a, ngaihdam a dil a ngai reng a nih chuan in inlaichinnaah ngaihtuahna sen thar a tul ang. A tihsual thin chu a tisual nawn fo a nih chuan ngaihdam a dil apianga ngaihdam reng a fuh bik lo. Chutiang bawkin hmeichhe thenkhat chuan an tihsual ni lo ah an inlaichinna a chhiat loh nan tiin a thiam lo zawk anga lan an ching thin. Hetiang pawh hi chin loh tur a ni. Mipa a tihuangtau a, a palzam telh telh che ang a, i nun a hrehawm tawlh tawlh zawk ang.
4. I hun zawng zawng i kawppui bulah hman tum kher suh. Inhmuh khat te hian inngaihna a tizual an tih hi a dik ve thei viau. Hmeichhia ten keimahni pual hun bik kan insiam thiam ve tur a ni. Engtik lai pawha kawppui te bula tawlh reng tur a ni bik lo. Mahni a chawlh hahdam leh hawi thawvenna hun te insiam ve tur a ni.
5. Inenkawl uluk reng rawh. Exercise te la la, i rilru leh taksa hrisel nan tan la la, i pian leh landan a mawi theih nan inenkawl uluk reng ang che. Hmeichhe tam takin pasal an neih hnuah mahni inenkawl uluk an peih lo a, nalh a tul an ti lo thin. Mahse, pasal neih hnuah tan lak sauh sauh zawk tur a ni, pasal ten duhawm leh nalh an tih theih tura awm tum zawk tur a ni.
6. I chin than te kha hlamchhiah mai suh. I hobby te kha bansan mai suh. Pasal neih hnuah kan nundan leh khawsak phung zawng zawng thlak vek kan tum hian kan buai thin. Kan nuam tih zawng te chu a remchan hunah tih zel tho tur a ni.
7. I kawppui hnenah engkim hrilh vek kher suh, a hriat loh atana tha zawk te pawh a awm. Hmeichhe thenkhat chuan an kawppui te lakah zêp ruk an neih hian rinawm lo ta riaua inngaihna te an nei thin, mahse, engkim hrilh vek kher hi a tul ber lo a, an hriattur chin erawh hrilh ngei tur a ni thung. A hriat atana tangkai lo a awm a, a hriat loh atana tha zawk pawh a awm, chu chu thliar thiam tur a ni. Hei hi kan thliar thiam loh chuan a hnua kan buai lehna mai mai tur a ni.
8. Inrintawnna hi inlaichinna tinghettu pawimawh ber te zinga mi, chutih rualin i kawppui chu a mizia leh awmdanah inthlak danglam deuh a awm em tih te chik hle ang che. Zankhat thil thuah a danglam thut a ni lo va, zawi zawiin a mizia leh awmdan, a hun hman dan te a lo danglam hret hret a, chu chu man thiam a pawimawh hle a, buaina lian zawk a thlen hmain thil dik lo i hraitchhuah phah thei dawn a ni.
Hmeichhe tan- tih sual loh tur
Get real time updates directly on you device, subscribe now.