Bakhmut beihnaah Russian thi nasa ti

Ukrainian city Bakhmut lak tuma beihna nikum summer atanga tan tawhah Russian sipai nunna chan 20,000 atanga 30,000 inkar an awm tawh tiin Western officials te chuan an sawi.
Heti taka inbeihna a nasat chhan hi Bakhmut awmnain pawimawhna thuk tak a neih vang nia sawi a ni a. Thla ruk chuang tehmeuh nasa taka inbeihna a thleng tawh chungin Bakhmut hmalam hun tur chu a la chiang lo hle thung a.
Bakhmut-in beih a tawh atangin a chhunga cheng mipui 90% te chuan khawpui an tlanchhuahsan tawh a, Donbas rewfion a administrative city lian lo tak hi building tluchhe rem ruma khat a ni tawh.
Russia kutah Bakhmut hi tlu ta pawh ni se, Moscow chuan a neih belh aiin a hloh a tam zawk dawn tho tho tiin Western officials te chuan an sawi bawk a.
Ukraine tan erawh Bakhmut chu Russian sipai thahnem tak zawlsam zawka tihhlum theihna remchang a ni hlauh thung tiin Ukraine official pakhat chuan a sawi thung a.
Ukraine sipaite pawhin chan an nei nasa hle a, mahse, Western officials t4e fighure tihchhuah chu Russia defence minister chuan a hnawl thung a.
Thuchhuah a siam zuiah Russia defence minister Sergei Shoigu chuan Ukraine chuan February thla chhung ngawt khan sipai 11,000 chuang a chan hman tiin a sawi.
“Kyiv in a mipuite a ngaihsaklohna hi mak tak a ni,” tiin Shoigu chuan a sawi a, hei hi Ukraine in Moscow chu civilian te himna engahmah ngai lova a puhna a chhanletna anga ngaih a ni a. Mahse, khawthlang ram te chuan Shoigu figure sawi chu an awihsak lo thung a.
Khawthlang ram te chuan Russia in Bakhmut laklet leh tuma hmatawng ber a neih Wagner mercenary group te chuan ralthuam mamawh tawk bakah mi leh sa an tlachham tawh tiin an sawi ve thung.
Chumi tichiang tur chuan tun hnaiah Wagner boss Yevgeny Prigizhin an Bakhmut lak a nih theih nana Wagner tena ammunition an mamawh te chu Russian military ten an pe thei lo tiin a sawi a. Prigozhin chuan ‘bureaucracy thil satliah emaw phatsanna vang’ tiin a chhang leh vang nia a ngaih a sawi.
Bakhmut lak tuma Russia chetlakna chuan hnungtawlhna nasa tak a thlen mek nia ngaih niin hei vang hian Ukraine allies te chuan Moscow in hmalam pan a tumna chu nasa taka tihtawlhin a awmphah niah an ngai bawk.
Western official te can Bakhmut lak tuma beihna chu tactical event te tham tia sawina leh a khawi ve ve tan pawhin Bakhmut chuan pawimawhna thuk tak a nei lo tia sawina chu a hnawl thu a sawi a.
Telegram kaltlanga thusawina a neihah Sergei Shoigu pawhin ‘Artyomovsk (Russia in Bakhmut a sawina) chhuah zalen tura beihna chu kalpui zel a ni’ tiin a sawi a. “He khawpui hi Donbas a Ukraine sipai te defensive hmunpui a ni a, he khawpui thunun hian Ukrainian military defensive line dang te thiah theihin a siam ang” tiin a sawi.
Mahse khawthlang ram officials te chuan Russia chuan nasa zawka beih tuma a inpuahchahna hmuh tur a awm rih lo an ti thung a. Mowcow in a beihnaa hotu lu ber Valery Gerasimov pawin nawrna nasa tak an neih thu sawiin, engtiangin nge thil a kal zel dawn sawi lawk theih a ni lo a ti bawk.
Tun hi Kyiv tantu khawthlang ram tena Moscow campaign in harsatna a tawk tia an sawi tum khatna a ni lo. Nikum lamah pawh Moscow chu hnungtawlh zelah an sawi tawh a, nikum favanga laia Ukraine in nasa zawka a beihlet avanga ram a lak nasat pawh an sawi bawk a. Mahse, Russia chuan thlasik vanglaiin ram zau tak a chhuhsak leh lawi si a ni.
Hetih lai hian Ukraine chuan Western ram tena ralthuam lama tanpuina an pek te dawng tanin chung zingah chan tank leh armoured vehicle tha tak tak te a tel a, nasa zawkin a ram laklet leh tumin chet a la tura ngaih niin May thla hma ngeiin nasa zawka huang a zauh rin a ni ve thung.