Georgia-ah lungawilohna lantir nasa hle

Georgian capital Tbilisi-ah chuan parliament in press freedom leh civil society te danchepna tur tia ngaih sawisel hlawh tak draft law a pawm avangin police leh lungawilote inbeihna nasa hle.
Police te chuan lungawilote hnawh darh nan water cannon leh pepper spray te an hmang hial a, a thenin EU leh Georgian flag te an vai thung a, sorkar chuan police thahnem takin hliam tuarin police bungrua tihchiatin a awm an ti bawk.
He bill hi khawvel ram hrang hrang te pawhin an sawisel na hle a, he bill hmang hian non-governmental organisation (NGOs) leh independent media te ram pawn atanga fund 20% chin chunglam dawng te chu foreign agent tiin an inpuan a ngai tih a ni.
Opposition te chuan bill chu sawiselin Russian-style law an tihsak a, Georgia vibrant civil society leh independent media tha tak te danchep tumna tiin an sawi.
US state department thupuangtu Ned Price pawhin draft legislation chu ‘hnuntawlhna nasa tak tur’ tiin a sawi bawk a. Price chuan US chuan he bill hian ‘Georgia mipui te rights pawimawh ber ber a chhuhsak dawn’ tiin a sawi bawk.
EU foreign policy chief Josep Borrell pawhin draft legislation chu ‘EU values leh standard nena inmil lo’ tiin a sawi bawk a. Brussels chuan Georgia in EU a tel a tumna chu a ngaihtuah mek lai a ni bawk.
Tuna Georgia-in dan siam a tum ang chiah hian kum 2012 khan Russia chuan ‘foreign agents’ law a lo pawm tawh a, chu chu Estern-funded NGOs leh media-te danchepna tura ruahmanna a ni.
“He dan hi Russian dan a ni a. Ex-Soveit Union a tel kan duh tawh lo va, European Union a tel kan duh a, pro-West kan ni” tiin lungawilohna lantirtu zinga pakhat chuan a sawi.
Georgia president Salome Zourabichvili chuan lungawilote chu a thlawp thu sawiin, Georgiza zalen leh hmalam hun Europe nena thlunzawm te an ni tiin a sawi a.
Mahse, parliament building chhungah chuan rorel lai Georgian Dream party a lawmkaer 76 te chuan he bll hi anthlawp thung tlat a, a hnuah committee hearing neihnaah he bill avanga intihbuaina a chhuak zui a ni.
He dan hi pawm fel a nih chuan Georgia chuan undemocratic leh authoritarian post-Soviet states heng Belarus, Tajikistan leh Azerbaijan te ang NGOs te khuahkhirhnaa Russian law copy tute chu a zawm ve dawn tihna a ni bawk.
History thlir chuan ‘agent’ tih thumal chu Russia leh Georgia-ah chuan ‘spy’ emaw ‘phatsantu’ tihna tluk niin civil soceity ah a chhe lam sawina anga ngaih a ni a. An chetlak dan chu ram leh khawtlang tan ni lo foreign ram te tana chetlakna anga ngaih a ni.
US embassy pawhin Georgia parliament hmalak dan chu ‘Georgia democracy a ni duhawm lo’ tiin a sawi a. “Kremlin tihdan anga dan siam hi Georgia mipui tena European union a luha democratic development an duhna nena inmil lo a ni,” a ti.
Bill pahnih ‘transparency of foreign agents’ tih leh ‘registration of foreign agents’ tih te chu anti-Western People’s Power movement, rorel lai mek Georgian Dream party te thawhpui chuan parliament-ah an theh lut a, an bill theh luh chu US Foreign Agents Registration Act (FARA) mila siam an ti zui bawk.
Georgian Dream te chuan he draft bill hi thlawpin langtlang zawka thil kalpui a nih theih nan mamawh a ni an ti ve thung a. Governning parety chairman Irakli Kobakhidze chuan US embassy thuchuah chu chhang letin ‘radical opposition leh supporters te tana hun duhawm lo’ tiin a sawi ve thung.
Lungawilo tam ber leh opposition tena he draft bill an duh lohna chhan ber chu Georgia ramin European Union zawm a tumna a hlawhtlin loh phah an hlauhna a ni a. A hmaa poll lakah Georgia mipui 80% te chuan European Union zawm an duh a ni.