Ballon d’Or boycott-ah Ancelotti la ding nghet

Ballon d’Or boycott-ah Ancelotti la ding nghet
Real Madrid coach Carlo Ancelotti chuan nikum Ballon d’Or ceremony-a an club an tel ve loh chungchangah Ballon d’Or dawng tur awm taka an ngaih Vinicius Jr thlang loa Manchester City midfielder Rodri thlan a nih avanga Ballon d’Or an boycott kha an tisual lo tih sawi nawn lehin, kha mi chungchangah khan club chuan thutlukna dik tak an siam niin a sawi.
Spanish giants lam chuan an star player Vinicius kha footballer mimal chawimawina hlu bik hi dawng awm ngawih ngawihah an ruat nghet hmiah a, mahse, a vunrawng avanga khelmual chhung leh pawna deusawhna leh diriamna tawk ngun em em a nihna bawk kha Ballon d’Or thlannaah pawh Brazilian mihang khan a tuar lehah an ngai nghet hmiah a, an player leh coach-te hming award sem inkhawmah khan lam chhuah ni nual tho mah se Bernabeu club chuan Paris khuaa lawmman sem inkhawm an boycott zui ta tho a ni.
Kha thil avang khan Real chuan sawiselna nasa tak an tawk a, midangte zahna tlachhama puhna hial an tawk.
An coach Ancelotti pawh kha coach of the year atana thlan ni mah se a lawmman dawn la turin a hmunah a inlan lo a, team of the year-ah Madrid player lang nual mah se tu mah inlan an awm lo a nih kha.
Nizan Champions League play-off first leg-a Manchester City hmachhawn tura Etihad Stadium an luh hma news conference-ah kum 65-a upa Italian coach chu nikum boycott chungchang kha chanchinbumite’n an zawt zui chat a, “Award sem inkhawma kan lang duh ta lo kha thutlukna dik lo niin ka ngai lo,” a ti.
Chelsea, Juventus leh AC Milan coach hlui chuan sawi chhunzawmin, “Vini kha Ballon D’Or dawngtu tur dik takah kan ngai a, Rodri kan zah loh vang pawh a ni lo. Spaniard kha player tha tak chu a ni ngei mai a, mahse, nikum kha chu a dawn kumah ka ngai lo a, a hmaleh chiah zawk kha award a dawn hun tur chu ni zawk turah ka ngai,” tiin media mite zawhna a chhang.
Kum 2023 khan Lionel Messi thlan a ni a, an thlan chhan ber pawh Paris St-Germain tana French league title a lak vang niin, a hnu lawkah Champions League football khelh phak lohna hmun Major League Soccer khel turin Inter Miami a zawm ta daih a, tah chuan MLS leh Mexican team-te inelna Leagues Cup-ah a team thar chu a champion-pui leh nghe nghe.
Ligue 1 title lak ringawt kha Ballon D’Or dawn phahna thamah Ancelotti hi chuan a ngai lo niin a lang a, Argentine ai chuan Manchester City player Rodri kha dawng awm zawkah a dah a ni.
2022-23 season-ah khan Spain international Rodri a chetha a, Champions League final-a Inter Milan an hneh tumin goal a khung a, City-in 2022-23 Treble hlawhtlinna an chan theihna kawnga player thawhhlawk a ni.
City manager Pep Guardiola ve thung chuan nikum Ballon D’Or lawmman sem chungchangah an club-in lawmlohna emaw lungawilohna an neih loh thu sawi chungin, “Rodri thlan a nih avang khan ka hlim a, mahse, Vinicius pawh khan kum chu a hmang tha ngang mai. Award dawn kha phu ve tho tur chu a ni a; a hma kum lamah pawh Lionel Messi leh Cristiano Ronaldo-te pawhin theihtawpin an fight ve tho a,” a ti.
Nikum Ballon D’Or boruak avangin nizan inkhel tur khan ngaihven a hlawh zual lo thei lo a; khup hliam chimawm ( cruciate knee injury) avangin Rodri a inlan thei lo a, Vinicius Jr erawh bultantu zinga tel thei tura beisei a ni.
Real khan an defender pawimawh rualkhat – Antonio Rudiger, Eder Militao, David Alaba leh Dani Carvajal-te an chhawr thei lo thup a, Ancelotti phei chuan an dinhmun kha ‘emergency’ ti hialin a sawi!
City lam pawh kha harsatna tawk ve mek tho niin, an buai dan erawh a dang deuh tih a ni mai a; nizana Spanish giants an mikhual hma ni riat kalta mai khan Arsenal khelmualah 5-1 tehrengin an mualpho a; chutih laiin, Thawhlehnia news conference-a hmachhawn tumin Real coach Ancelotti chuan Etihad stadium-a inkhelh chu a awlsam dawn chuang lo tih a sawi a, result erawh kan tarlang hman ta lo.