US chuan Chinese surveillance balloon an kahthlak tak ang chu China chuan khawmualpui panga laiah inenthlak nan a hmang tiin an sawi.
-- Advertisement --
“He inenthlakna kalpuiah hian United States chauh bitum a ni lo” tiin Secretay of State Antony Blinken chuan a sawi a.
US chuan balloon atanga information an hmuh theih ang ang chu ram hrang hrangte pawh a hrilh hriat ve nghal thu a sawi bawk a.
China chuan balloon te chu spy nana hman a ni lo tia sawiin weather device kal peng sual ta tiin a sawi thung.
US officials te chuan an balloon kahthlak chu 200 ft (60m) laia sang niin regional airlines tena an phur theih anga tam pound za tel tehmeuh phur thei tiin an sawi bawk.
Kar kalta Inrinni khan South Carolina coast-ah fighter jet-in a kahthlak niin hei vang hian diplomatic crisis thleng nghalin Secretary Blinken pawhin China tlawh a tum chu a thulh phah chuk chuk a ni.
US chuan heng balloon-te hi China-a coastal Hainan province atanga kahchhuah niin Japan, India, Vietnam, Taiwan leh Philippines te chu thlurbing bik an ni, a ti bawk.
Nilaini khan US Defence Department thupuangtu Brigadier General Pat Ryfer chuan US chuan heng balloon te hi North leh South America, South East Asia, East Asia leh Europe ah te inenthlak nana kahchhuah an ni tih a hria tiin a sawi bawk a.
“Heng balloon te hi kan hrefiah tawh a, chhui zui dan pawh kan hria” tiin Gen Ryder chuan sawiin US chuan hetiang thil te chhui zuia hrefiah turin theihna a nei tiin a sawi bawk.
Heng balloon te hi inenthlak nana hman ber niin an len lam leh theihna neih te pawh a inang lo nuai a ti bawk a. US territory chhungah balloon te hi tum li lai an thlawk lut tawh tiin Gen Ryder chuan a sawi bawk.
US chuan a balloon kahthlak them te chu la chharkhawm mek zelin he balloon nihna chiah, eng nge a tih theih leh engtiangin nge information a pek chhuah tih te chu la hriatfiah tur chauh a ni thung.